वार्तामा सहमति, आन्दोलन फिर्ता : राप्ती स्वास्थ्य विज्ञान प्रतिष्ठान

• छारे रोगको समस्या लिएर अस्पतालमा उपचारका लागि ल्याइएका ११ वर्षीय बालकको  मृत्यु
• बिहीबार विहान मृत्यु भएको शुक्रबार राति अस्पताल प्रशासनसँगको वार्तामा सहमति, आन्दोलन फिर्ता
• उपचारका क्रममा लागेको सम्पूर्ण खर्च प्रतिष्ठानले ब्यहोर्न  

दाङ ।।

राप्ती स्वास्थ्य विज्ञान प्रतिष्ठानमा ११ बर्षीय बालकको मृत्यु भएको बिषयमा मृतक परिवार र अस्पतालबीच सहमति भएको छ ।

शुक्रबार राति अस्पताल प्रशासनसँगको वार्तामा सहमति भएपछि मृतब बालकको परिवारले आन्दोलन फिर्ता लिएको छ । शनिबारदेखि अस्पतालको आकस्मिकसहित सेवा सञ्चालन भएको छ ।

बिहीबार उपचारका क्रममा घोराही उपमहानगरपालिका- ३ का ११ बर्षीय बालक आक्रोश नेपालीको मृत्यु भएपछि परिवारका सदस्य र आफन्तले आन्दोलन गर्दै प्रतिष्ठानको सेवा बन्द गराएका थिए ।

मृतह परिवार र अस्पताल पक्षबीच बालकको मृत्यु भएको घटनाको छानबिन गर्न घोराही- ३ का वडा अध्यक्ष रामप्रसाद चौधरीको संयोजकत्वमा ७ सदस्यीय छानबिन समिति गठन गर्ने सहमति भएको प्रतिष्ठानका उपकुलपति प्राध्यापक डा. विकास लामिछानेले जानकारी दिए ।

वार्तामा मृतकको परिवारका सदस्यलाई रोजगारी दिने, परिवारका लागि आर्थिक सहयोग जुटाउन सर्वपक्षीय समिति बनाई सहयोग संकलन गर्ने सहमति पनि भएको छ । मृतकको परिवारलाई राहत दिन स्थानीय सरकार, प्रदेश र संघ सरकारसँग अनुरोध गर्ने सहमति भएको छ ।

बालकको उपचारका क्रममा लागेको सम्पूर्ण खर्च प्रतिष्ठानले ब्यहोर्न पनि सहमति भएको उपकुलपति डा. लामिछानेले बताए । वार्तामा सहमति भएसँगै मृतक बालकको शब आफन्तले जिम्मा लिन तयार भएका छन् । छारे रोगको समस्या लिएर अस्पतालमा उपचारका लागि ल्याइएका ११ वर्षीय बालक आक्रोश नेपालीको मृत्यु भएपछि मृतकका आफन्तले क्षतिपूर्तिको माग गर्दै बिहीबार र शुक्रबार दिनभर अस्पताल घेराउ गरेका थिए । मंगलबार साँझ प्रतिष्ठानमा उपचारका लागि ल्याएका बालकको बिहीबार विहान मृत्यु भएको थियो ।

• संसद विघटन