आरजु राणाको भ्रामक प्रचार नरोकिए प्रतिकार गर्ने चेतावनी
अध्यक्ष विद्वान गुरुङद्वारा विज्ञप्ति जारी गर्दै आरजु बचाउ माग
घृणित र अवान्छित मनोवृत्तिका व्यक्तिलाई कानुनको दायरामा ल्याउन अनुरोध
काठमाडौं ।।
नेपाली कांग्रेसको भ्रातृ संस्था नेपाल तरूण दलले नेता आरजु राणा देउवाविरुद्धको भ्रामक प्रचार नरोकिए प्रतिकार गर्ने चेतावनी दिएको छ । अध्यक्ष विद्वान गुरुङले विज्ञप्ति जारी गर्दै देउवाको बचाउ गरेका हुन् ।
तरुण दलले आरजुलक्षित सामाजिक प्रतिष्ठा, इज्जत एवं मानमर्यादामा प्रत्यक्ष आँच पुऱ्याउने दुरासय राखी सामाजिक सञ्जालमा झुटा र अनर्गल पोष्टप्रति आपत्ति जनाएको छ ।
राजनीतिक पूर्वाग्रह राखी भएको घृणित र अवान्छित मनोवृत्तिका व्यक्ति र समूहहरुलाई तीन दिनभित्र कानुनको दायरामा ल्याउन तरुण दलले गृह मन्त्रालयसँग माग गरेको छ ।
“देशको कानुनको नै बर्खिलाफ हुने गरी कलाकारहरुले कलाकारिताको मर्यादा र गरिमालाई नै आँच पुग्ने गरी सुवास बोहोरा भन्ने नामको टिकटक आईडीबाट माननीय सांसद आरजु राणा देउवाको गरिमा र इज्जतमा गम्भीर आँच पुग्ने खालको प्रकाशित सामग्रीप्रति आपत्ति प्रकट गर्दै नेपाल तरुण दल केन्द्रीय समिति त्यस प्रकारको व्यक्तिलक्षित भ्रामक कार्यको घोर भर्त्सना गर्दछ,” विज्ञप्तिमा उल्लेख छ ।
तरुण दलको आग्रहलाई बेवास्ता गरिए त्यस्ता गतिविधिविरुद्ध आफै प्रतिकारमा उत्रन बाध्य हुने पनि विज्ञप्तिमा जनाइएको छ ।
