सुन तस्करी प्रकरणमा उच्चस्तरीय छानबिन समिति गठनको काम अघि बढ्यो: प्रधानमन्त्री
साझा परिवेश
शुक्रबार, भदौ २९, २०८० १४:१0
प्रधानमन्त्री पुष्पकमल दाहाल प्रचण्डले सुन तस्करी प्रकरणको छानबिनका लागि उच्चस्तरीय समिति गठनको कार्य अघि बढेको बताएका छन् । शुक्रबार प्रतिनिधि सभा बैठकमा सम्बोधन गर्दै प्रधानमन्त्री प्रचण्डले सुन तस्करी प्रकरणमा सीआईबीले अनुसन्धान सकेको र अब उच्चस्तरीय समिति गठन हुने जानकारी दिए ।
प्रहरीको केन्द्रीय अनुसन्धान ब्यूरो (सीआईबी)ले अध्ययन गरी अनुसन्धान प्रतिवेदन जिल्ला सरकारी वकिल कार्यालयलाई बुझाएकाले अब एमालेसहितका दलहरुसँग आफूले गरेको सहमति अनुसार समिति गठन गर्ने प्रक्रिया अघि बढेको प्रधानमन्त्रीले उल्लेख गरे ।
‘सुन तस्करीमा अनुसन्धान सकिएको छ । सीआईबीले आफ्नो प्रतिवेदन बुझाएको छ,’ प्रधानमन्त्री प्रचण्डले भने, ‘सहमतिअनुसार अब उच्चस्तरीय छानबिन प्रक्रिया अघि बढ्ने छ ।’
साउन २ गते विमानस्थल बाहिरबाट ६० किलो सुन समातिएपछि विपक्षी एमालेले उच्चस्तरी छानबिन समितिको माग गर्दै सदन अवरोध गरेको थियो । एमालेसहित सात राजनीतिक दलबीच सिआइबीले प्रतिवेदन बुझाएपछि सुन काण्डको समग्र पक्षको अध्ययन गर्न छानबिन समिति बनाउने सहमति भएको थियो ।
