ढाका / बंगलादेशमा यस वर्ष हाल सम्म १ लाख ८७ हजार ७२५ जनामा डेंगी संक्रमण देखिएकोमा ९०० भन्दा बढीको मृत्यु भएको स्वास्थ्य विभागले जनाएको छ । स्वास्थ्य मन्त्रालयअन्तर्गतको स्वास्थ्य सेवा महानिर्देशनालयले सार्वजनिक गरेको तथ्यांंक अनुसार सेप्टेम्बरमा ३१६, अगस्टमा ३४२ र जुलाईमा २०४ गरी कुल ९०९ जना डेंगी संक्रमित बिरामीको मृत्यु भएको हो ।
महानिर्देशनालयका अनुसार सेप्टेम्बरमा ६३ हजार ९१७, अगस्टमा ७१ हजार ९७६ र जुलाईमा ४३ हजार ८५४ जनामा संक्रमण पुष्टि भएको छ । दक्षिण एसियाली मुलुकमा स्थानीय समय अनुसार आइतबार बिहान ८ बजेसम्म पछिल्लो २४ घण्टामा १६ जनाको मृत्यु भएको थियो भने ३ हजार ८ जनामा डेंगी संक्रमण देखिएको छ ।यो वर्ष हालसम्म निको हुनेको संख्या १ लाख ७६ हजार ३४६ जना पुगेको स्वास्थ्य तथा जनसंख्या मन्त्रालयले जनाएको छ । लामखुट्टेको टोकाइबाट सर्ने रोगको उच्च जोखिममा रहेको बंगलादेशमा जुन–सेप्टेम्बरको मनसुन अवधि डेंगी ज्वरोको मौसम हो ।
