सर्वसाधरणको गुनासो व्यवस्थापनको लागि क्यूआर कोड सार्वजनिक
बिराटनगर।
कोशी प्रदेश प्रहरी कार्यालय बिराटनगरले सर्वसाधरणको गुनासो व्यवस्थापनको लागि क्यूआर कोड सार्वजनिक गरेको छ । प्रहरी महानिरीक्षक बसन्तबहादुर कुँवरले कोशी प्रदेश प्रहरीको क्यूआर कोड सार्वजनिक गरेका हुन् । गुनासो सुन्नका लागि क्यूआर कोड सार्वजनिक गर्दै उनले प्रविधिको दुरुपयोग गरी आपराधिक क्रियाकलाप बढ्दो क्रममा रहेको उल्लेख गर्दै प्रहरीलाई दक्षता अभिबृद्धि गरी प्रविधिमा अब्बल बनाइने बताए ।
उजुरी पेटीकाको डिजिटल संस्करणको रुपमा प्रदेश प्रहरी कार्यालयले क्यूआर कोड प्रयोगमा ल्याएको हो । यसअघि जिल्ला प्रहरी कार्यालय उदयपुरले संचालनमा ल्याएको क्यूआर कोडको प्रयोग प्रभावकारी भएकोले कोशी प्रदेश प्रहरी कार्यालय विराटनगरले यसलाई थप परिमार्जन गरी कोशी प्रदेश अन्तरगत रहेका सबै प्रहरी कार्यालयले प्रयोग गर्ने गरी कार्यान्वयनमा ल्याएको हो ।
