जापान पठाउने भन्दै झण्डै आधा करोड ठगी गर्ने म्यानपावर सञ्चालक समातिए
साझा परिवेश
सोमवार, अशोज १५, २०८० १६:४८
काठमाडौं । १२ जना युवायुवतीलाई वैदेशिक रोजगारीको लागि जापान पठाइदिन्छु भन्दै झण्डै आधा करोड रुपैयाँ ठगी गरेको आरोपमा प्रहरीले एक म्यानपावर सञ्चालकलाई पक्राउ गरेको छ ।
पक्राउ पर्नेमा मोरङ लेटाङ घर भई काठमाडौंको धुम्बाराहीमा बस्ने जेनुयन प्लेसमेन्ट प्रा.लिका सञ्चालक डिल्लीराम खतिवडा रहेका छन् ।
प्रतिव्यक्ति रु आठ लाख रुपैयाँ लागतमा जापान पठाइदिने र त्यहाँ पुगेका मासिक एक लाख ८० हजार तलब हुनेगरी काममा लगाइदिने भन्दै उनले पीडितहरूबाट पटक पटक गरी छयालीस लाख रुपैयाँ लिएर सम्पर्कबिहीन भएका छन् ।
सम्पर्कबिहीन भएका खतिवडालाई काठमाडौं उपत्यका अपराध अनुसन्धान कार्यालयको टोलीले शुक्रबार दिउँसो कोटेश्वरबाट पक्राउ गरेर आज सार्वजनिक गरेको हो ।
पीडितहरू आफू ठगिएको भन्दै वैदेशिक रोजगार विभागमा उजुरी दिएपछि विभागले अपराध अनुसन्धान कार्यालयलाई पत्र लेख्दै खतिवडालाई विभागमा उपस्थित गराउन अनुरोध गरेको थियो ।
पक्राउ परेका खतिवडालाई थप अनुसन्धान तथा कारबाहीको लागि आज वैदेशिक रोजगार विभाग, ताहाचल काठमाडौं पठाइएको प्रहरी उपरीक्षक मिलन के.सीले जानकारी दिए ।
