काठमाडौँ ।
जनता समाजवादी पार्टी (जसपा) नेपालका प्रमुख सचेतक प्रदीप यादवले मधेशमा पछिल्लो समययता धाार्मिक सद्भाव बिथोल्न भइरहेका गतिविधिप्रति सरकारको ध्यानाकर्षण गराएका छन् ।
बिहीबार प्रतिनिधिसभाको बैठकमा बोल्दै यादवले धार्मिक तनाव बढाउनुको पछाडि पूर्वराजा ज्ञानेन्द्र शाहको हात रहेको आशंका रहेको बताए । ‘अहिले आफूलाई राजावादी भन्नेहरू हौसिएका छन् । किन ? । कतै आगो लगाएर न्यानो ताप्ने योजना त छैन ?,’ उनले प्रश्न गरे ।
यादवले पूर्वराजा ज्ञानेन्द्र शाहको लोकतन्त्र विरोधी गतिविधिको निगरानी गर्न सरकारसँग गरे । ‘अहिले मधेशमा एउटा कुनै शक्तिले षड्यन्त्रको तानाबाना बुनेर धार्मिक तनाव गराउने खेल खेलिरहेको छ,’ उनले भने । मधेशको राजनीतिक शक्ति भनेकै हिन्दू र मुस्लिमबीचको साझा एकता रहेको भन्दै यादवले तर अहिले धार्मिक द्वन्द्व फैलाएर मधेशी जनताबीचको एकतालाई तोडने षड्यन्त्र भइरहेको बताए ।
उनले धार्मिक द्वन्द्व चर्काउने, हिंसाका लागि उक्साउने, सामाजिक सद्भाव भड्काउने अभिव्यक्ति दिने महन्थ वा मौलवी जोसुकै भए पनि उनीहरूलाई कानुनी कारबाहीको दायरामा ल्याउन सरकारसँग माग गरे ।
समाजमा द्वन्द्ध र हिंसा फैलाउन उक्साउने व्यक्ति वा समूहको फेसबुक र टिकटक आईडी सरकारलले तुरुन्त बन्द गर्नुपर्नेमा जोड दिए । ‘सोसल मिडियामा उत्तेजक सामग्री राख्ने , पुराना भिडियोलाई तोडडमोड गरी ताजा घटनाका रूपमा प्रस्तुत गर्ने, अर्काको धर्म वा धर्मावलम्बीलाई अपमान गर्ने, गाली गलौज गर्ने, हिंसा फैलाउन झूटा, मनगढंत कुरा राख्नेहरूको तुरन्त पहिचान गरी दण्डित गर्नुपर्छ । उनिहरूको फेसबुक र टिकटक आईडी सरकारले तुरून्तै बन्द गर्नुपर्छ,’ उनले भने ।
