१९औं एसियाली खेलकुदअन्तर्गत क्यानोइङमा नेपालका गणेश गुरुङ शुक्रबार हुने सेमिफाइनल चरणका लागि छनोट
१६ जनामध्ये १० खेलाडी फाइनल चरणमा प्रतिस्पर्धा गर्ने छन्। बाँकी ६ खेलाडी बाहिरिने
हाङचाओ : १९औं एसियाली खेलकुदअन्तर्गत क्यानोइङमा नेपालका गणेश गुरुङ शुक्रबार हुने सेमिफाइनल चरणका लागि छनोट भएका छन्। दुई चरणको हिट्समा सहभागी भएका गणेश सेमिफाइनल चरणमा पुगेका हुन्। क्यानोइङमा १६ खेलाडी सेमिफाइलमा पुग्ने प्रावधान छ।
गणेश पहिलो हिट्समा १६ खेलाडी सहभागी भएकोमा १४औं भएका थिए। पहिलो हिट्सबाट आठ खेलाडी सेमिफाइनल चरणमा पुगेका थिए। दोस्रो हिट्समा नेपालका गणेशसहित आठ खेलाडीले प्रतिस्पर्धा गरेकोमा उनी सातौं भए पनि छनोट हुन सफल भए। दोस्रो हिट्समा खेलेका सबै खेलाडी सेमिफाइनल चरणमा छनोट भएका थिए। सेमिफाइनल चरणमा १६ खेलाडी छनोट भएका छन्। १६ जनामध्ये १० खेलाडी फाइनल चरणमा प्रतिस्पर्धा गर्ने छन्। बाँकी ६ खेलाडी बाहिरिने छन्।
यसैगरी कुस्तीमा नेपालकी सुवाङ्गी दुवे पराजित भएकी छन्। लिनान् स्पोर्ट्स कल्चर एन्ड एक्जिबिसन सेन्टरमा भएको महिला ५७ केजीको पहिलो चरणको खेलमा थाइल्यान्डकी श्रृपाराले सुवाङ्गीलाई ८–० ले पराजित गरेकी हुन्। पहिलो राउन्डमा श्रृपाराले ८–० अंक जोडिन् भने दोस्रोमा दुवैले अंक बटुल्न सकेनन्।
