काठमाडौं- ईसेवाको नक्कली कर्मचारी बनेर ठगी गर्ने समूहलाई प्रहरीले पक्राउ गरेको छ। उपत्यका अपराध अनुसन्धान कार्यालयको टोलीले रौतहटका विभिन्न स्थानबाट ५ जनालाई पक्राउ गरेको हो।
उनीहरूले १८ जनालाई फोन गरेर ईसेवाको कर्मचारी भन्दै लाखौं रुपैयाँ ठगी गरेको उजुरी परेपछि प्रहरीले अपरेसन थालेको थियो। पक्राउ पर्नेमा रौतहटको गौर नगरपालिकाका २६ वर्षीय नवनित कुमार कुशवाहा, २१ वर्षीय कन्हैया कुमार कुशवाहा, १९ वर्षीय दीपेन्द्र कुमार यादव, २० वर्षीय अभय कुमार यादव र २१ वर्षीय रितेश कुशवाहा रहेका छन्।
उनीहरूले मानिसहरुलाई मोबाइलबाट फोन गरी सुरुमा ईसेवाको आधिकारिक कर्मचारी हुँ भन्ने र पछि तपाईंको आईडी बैंक खातासँग लिंक तथा खाता नवीकरण, ५० प्रतिशत क्यासब्याक रकम उपलब्ध गराइदिन्छु भन्दै पीडितहरूलाई विश्वास दिलाउने गरेको प्रहरीको अनुसन्धानबाट खुलेको छ। त्यसपछि पीडितकै मोबाइल नम्बरमा ओटीपी (वान टाइम पासवर्ड) पठाई कोड मागेर ठगी गर्ने गरेको देखिएको प्रहरीले बताएको छ।
ओटीपी कोड आएपछि वालेट तथा बैंक खाता लिंक गराएर रकम झिक्ने गरेको पाइएको छ। यो समूहले अहिलेसम्म १८ जनाको खाताबाट १५ लाख २० हजार ९ सय रुपैयाँ ठगी गरेको प्रहरीको अनुसन्धानमा देखिएको छ।
