मानव अधिकारमैत्री ऐन बनाइ संसदको गरिमा जोगाउन आग्रह गर्दै प्रदर्शन

काठमाडौं । संक्रमणकालीन न्याय प्रक्रिया सम्बन्धी संसदमा विचाराधिन संशोधन विधेयक मानव अधिकारमैत्री बनाइ संसदको गरिमा जोगाउन आग्रहसहित मानव अधिकार तथा शान्ति समाजले संसद भवन नयाँ बानेश्वर अगाडि प्रदर्शन गरेको छ ।

आइतबार दिउँसो संसद भवनको ३ नम्बर गेट अगाडि भएको प्रदर्शनमा नेपाल सरकारः हिंसालाई महिमामण्डन गर्ने काम बन्द गर्न, फागुन १ गते “जनयुद्ध दिवस” का नाममा बिदा दिने निर्णय खारेज गर्न र विस्तृत शान्ति सम्झौताको मर्म अनुरुप पीडितलाई न्याय र पीडकलाई सजाय सुनिश्चित गर्न माग गर्दै प्रदर्शन भएको हो ।

दिउँसो एक बजे प्रदर्शन सुरु हुने कार्यक्रम रहेको तर १० मिनेट अगावै जम्मा हुने क्रममा प्रहरीले प्रदर्शनकारीलाई गिरफ्तार गरेको थियो । त्यसक्रममा संस्थापक सभापति कृष्ण पहाडी, सभापति रामकृष्ण बराल, सल्लाहकार उत्तम पुडासैनी, सचिवहरु रामप्रसाद जोशी र चन्द्रमणी बञ्जारा, कोषाध्यक्ष किरण ढकाललगायत २७ जनालाई गिरफ्तार गरी बानेश्वर प्रहरी वृत्त तीनकुनेमा राखिएको छ ।

विस्तृत शान्ति सम्झौताको मर्म विपरीत, मानव अधिकारको गम्भीर उल्लंघन गर्ने तथा मानवता विरुद्धको अपराधमा संलग्नहरुलाई (दशक लामो सशस्त्र द्वन्दका दौरान) आम माफी दिने नियतले भइरहेको चलखेलप्रति आपत्ति व्यक्त गर्दै शान्ति समाजले अभियान सञ्चालन गरिरहेको छ । यसैगरी शान्ति समाज दाङ शाखाले पनि आज तुलसीपुरमा प्रदर्शन गरेको छ ।

• संसद विघटन