भूकम्पले १३ हजार बढी घरमा क्षति, ३ हजार ७३ पूर्ण सखाप

• भूकम्पले १० जिल्लामा १३ हजार ४२९ घरमा क्षति
• क्षतिको विवरण संकलन गर्ने कार्य जारी
• चार हजार ७६० घरमा सामान्य क्षति

काठमाडौं ।।

जाजरकोटलाई केन्द्रविन्दु बनाएर शुक्रबार राति आएको भूकम्पले १० जिल्लामा १३ हजार ४२९ घरमा क्षति पुर्‍याएको प्रारम्भिक अध्ययनले देखाएको छ । ६.४ म्याग्निच्युडको भूकम्पले सबैभन्दा बढी जाजरकोट र रुकुम (पश्चिम) का घरमा क्षति गरेको छ । क्षतिको विवरण संकलन गर्ने कार्य जारी रहेकाले यो संख्या अझ बढ्ने देखिन्छ । गृह मन्त्रालय र सम्बन्धित जिल्ला प्रशासन कार्यालयबाट बाह्रखरीलाई प्राप्त प्रारम्भिक विवरणअनुसार भूकम्पले तीन हजार ७३ घरमा पूर्ण, पाँच हजार ५९५ घरमा आंशिक र चार हजार ७६० घरमा सामान्य क्षति गरेको छ ।

रुकुम पश्चिम जिल्ला प्रशासन कार्यालयका सहायक प्रमुख जिल्ला अधिकारी प्रवेश बढुवालका अनुसार भूकम्पले रुकुम पश्चिममा मात्र ९ हजार ५३८ घरमा क्षति गरेको छ । यो आइतबार रातिसम्म प्राप्त विवरण हो । रुकुम पश्चिममा भूकम्पले दुई हजार १३६ घरमा पूर्ण, दुई हजार ६४२ घरमा आंशिक र चार हजार ७६० घरमा सामान्य क्षति गरेको उनले बताए ।  “भूकम्पले क्षति गरेको विवरण संकलन गर्ने कार्य जारी छ । स्थानीय तहबाट विवरण आइरहेका छन् । क्षति भएका घरको संख्या अझै बढ्छ,” सहायक प्रमुख जिल्ला अधिकारी बढुवालले भने ।

• संसद विघटन