अभिनेत्री रेखा थापाका लागि यो वर्ष विशेष छ । यसको दुईटा कारण छ । पहिलो, उनी अभिनीत फिल्म ‘उपहार’ महाशिवरात्रीको अवसर पारेर आगामी फागुन २५ गतेबाट प्रदर्शनमा आउँदैछ । दोस्रो, फिल्म रिलिजको बेला उनी आमा भैसकेकी हुनेछिन् । पाँच महिनाको गर्भवती रहेको समयमा उनले फिल्ममा काम गरेकी थिइन् । यसैले छायांकन भ्याउन निर्माण टिममा राम्रै हतारो थियो ।
खासमा उनी फिल्मको छायांकन नभ्याउँदासम्म गर्भवती हुने सोचमा थिइनन् । त्यसैले रेखाले फिल्मका लागि ‘जिरो फिगर’ बनाउन जिम धाइरहेकी थिइन् । तर, गर्भवती भएपछि फिल्ममा आफूलाई ‘स्लिम’ देखाउने उनको इच्छा अधुरै रह्यो । र, फिल्ममा कसरी काम गर्ने भन्ने ठूलो चुनौती उनमा थियो । यद्यपि, उनले आँट गरेर फिल्ममा एक्सनसम्म गरिन् । जुन धेरैका लागि प्रेरणा बन्नसक्छ ।
फिल्मको ‘वाह् वाह् वाह्’ गीत रिलिजमा उनले भनेकी थिइन्, ‘मैले कविराज गहतराज (कोरियोग्राफर)लाई पहिलाको जस्तो लड्का झट्कावाला डान्स स्टेप नदेऊ भनेकी थिएँ । तर, मलाई फिल्ममा कस्तो नाच्न मन थियो । त्यसैका लागि २५ कम्मर पनि बनाएकी थिएँ मैले । पूजा शर्मा र म सँगै जिममा आउँथ्यौं । यस्तो राम्रो शरीर बनाउँदा बनाउँदै अप्रत्याशित उपहार आएको हो मेरो चाहिँ ।’
छायांकनमा आफूलाई प्राविधिकदेखि छायाँकारसम्मले एकदमै सहज वातावरण सृजना गरिदिएकोमा उनी कृतज्ञ देखिइन् । यद्यपि, छायांकनको बेला आफ्नो एकदमै ‘मूड स्विङ’ भएको उनको अनुुभव छ । रेखाले ‘उपहार’बाट करिब ५ वर्षपछि कमब्याक गरेकी हुन् । राष्ट्रिय प्रजातन्त्र पार्टीबाट राजनीतिमा सक्रियता बढेपछि उनी फिल्म ‘मालिका’पछि अभिनयमा निस्क्रियझैँ देखिएकी थिइन् ।
