काठमाडौं । बढ्दो चिसो र खुला ठाउँमा रात बिताउनुपर्दा जाजरकोट, रुकुमपश्चिम र सल्यानका भूकम्पपीडित बिरामी पर्न थालेका छन् ।
खासगरी बालबालिका, गर्भवती र वृद्धवृद्धा चिसोबाट बढी प्रभावित भएका छन् । उनीहरुलाई रुघाखोकी र निमोनियाको जोखिम बढेको उपचारमा संलग्न स्वास्थ्यकर्मीले बताएका छन् ।
सफा पानी र सहज शौचालयको अभावमा झाडापखला र हैजाको प्रकोप फैलिन सक्ने जोखिम पनि बढेको छ । पीडितहरुले भने सहज रुपमा राहत पाउन नसकेको र ६ दिन हुँदा पनि खुला आकाशमुनि बस्नु परेको गुनासो गरेका छन् ।
भूकम्प प्रभावित जाजरकोट र रुकुम पश्चिमका पीडितलाई भने स्थानीय सरकारमार्फत् राहत सामग्री वितरण गरिएको छ ।
जिल्ला प्रशासन कार्यालय जाजरकोटले जिल्लाका ७ वटै स्थानीय तहका भूकम्पपीडितलाई राहत सामग्री पठाइएको जनाएको छ । भेरी, नलगाड र छेडागाड नगरपालिका तथा कुशे, बारेकोट, जुनीचाँदे र शिवालय गाउँपालिकाका पीडितलाई पहिलो चरण चामल, दाल, त्रिपाल कम्बल-लगायतका सामग्री वितरण गरिएको छ । यसमा एक सय आठ प्रकारका राहत सामग्री रहेका छन् ।
पीडितहरूले भने पहुँचका आधारमा मात्रै राहत वितरण गरिएको भन्दै असन्तुष्टि जनाएका छन् । भाडामा बसेका पीडितलाई घरधनीको सिफारिसमा मात्रै राहत दिने मापदण्ड बनाइएपछि वितरणमा कठिनाइ भएको छ ।
