माग पूरा नभए सत्याग्रह सुरु गर्ने डा. केसीको चेतावनी
साझा परिवेश
आइतवार, मंसिर ३, २०८० १४:0५
प्रा.डा. गोविन्द केसीले मंसिर २९ गते सत्याग्रह सुरु गर्ने चेतावनी
माग पूरा गर्ने आश्वासनपछि अनसनको कार्यक्रमलाई मंसिर २८ गतेसम्म सारे
सरकारी मेडिकल कलेज वा प्रतिष्ठान तुरुन्त निर्माण गर्न उनले माग राखे
काठमाडौं ।।
प्रा.डा. गोविन्द केसीले मंसिर २९ गते सत्याग्रह सुरु गर्ने चेतावनी दिएका छन् । चिकित्सा क्षेत्रको धारका अभियन्ता केसीले मंसिर २८ गतेसम्म आफ्ना माग पूरा नभए २९ गतेदेखि सत्याग्रह लगायतका आन्दोलनका कार्यक्रम सुरु गर्ने चेतावनी दिएका हुन् । डा. केसीले आइतबार विज्ञप्ति जारी गर्दै यसअघि राखिएकाे आफ्ना माग र सरकारले दिएकाे समयसीमा बारे जानकारी गराएका हुन् । यसअघि सरकारले माग पूरा गर्ने आश्वासनपछि अनसनको कार्यक्रमलाई मंसिर २८ गतेसम्म सारेका थिए ।
डा. केसीले विगतमा भएका सम्झौता, सरकारी स्वास्थ्य केन्द्र र अस्पतालहरूमा निःशुल्क औषधी तथा उपचार व्यवस्था, गेटा मेडिकल कलेजलाई तुरुन्त सञ्चालनमा ल्याउने, डडेलधुरा, उदयपुर, ईलाम लगायतमा ऐनमा उल्लेख भएअनुसार प्रत्येक प्रदेशमा कम्तिमा एउटा सरकारी मेडिकल कलेज वा प्रतिष्ठान तुरुन्त निर्माण गर्न उनले माग राखेका थिए । यस्तै, विश्वविद्यालय तथा प्रतिष्ठानका पदाधिकारी मापदण्ड सम्वन्धी उच्च शिक्षा ऐन पारित गर्न, एकीकृत स्वास्थ्य शिक्षा प्रतिष्ठान ऐन पारित गर्न, चिकित्सा शिक्षालाई गैरनाफामूलक बनाउने प्रकृया अगाडि बढाउनसमेत केसीले माग राखेका छन् ।
