प्रदेश र चीनको च्याङ्सी प्रान्तबीच मैत्री सम्बन्ध कायम
नेपाल–चीन व्यापार संघबीच मैत्रीपूर्ण सहयोगको आशयपत्रमा हस्ताक्षर
प्रान्तीय कमिटी र नगरका प्रतिनिधिहरु पनि समारोहमा सहभागी
काठमाडौँ ।।
बागमती प्रदेश र चीनको च्याङ्सी प्रान्तबीच मैत्री सम्बन्ध कायम भएको छ । आज राजधानीमा आयोजित कार्यक्रममा औपचारिक रुपमा सम्बन्ध राखिएको जानकारी दिइएको छ । औपचारिक सम्बन्धसँगै दुई प्रदेश र प्रान्तबीच मैत्रीपूर्ण सहयोगको आशय पत्र, च्याङ्सी मैत्री संघ र नेपाल–चीन व्यापार संघबीच मैत्रीपूर्ण सहयोगको आशयपत्रमा हस्ताक्षर भएको छ । च्याङकाङशान नगर र महालक्ष्मी नगरपालिकाबीच मैत्रीपूर्ण सहयोग आशयपत्र, गान्झाउ नगर र पोखरा महानगरबीच आधुनिक कृषि र पर्यटन विकासमा सहकार्य गर्ने आशयपत्रमा पनि सोही समारोहमा हस्ताक्षर गरिएको छ ।
त्यसैगरी चाइना फार्मास्युटिकल र नेपाली कम्पनीहरूले व्यापार सहयोग गर्नेबारेको आशय पत्रमा हस्ताक्षर भएको बताइएको छ । च्याङ्सी प्रान्तीय जनसंघका कार्यकारी उपाध्यक्ष तु आन्बोको अध्यक्षतामा भएको कार्यक्रममा प्रमुख अतिथि उपप्रधान तथा गृहमन्त्री नारायणकाजी श्रेष्ठ हुनुहुन्छ । बागमती प्रदेशका मुख्यमन्त्री शालिकराम जमकटेल, नेपालका लागि चिनियाँ राजदूत छन् सोङलगायत नेपाल भ्रमणमा रहेको च्याङ्सी प्रान्तीय कमिटी र नगरका प्रतिनिधिहरु पनि उक्त समारोहमा सहभागी हुनुभएको हो ।
