पोखरा । पोखरामा एक चिहान नामक नाटक मञ्चन सुरु भएको छ । मंगलबारदेखि मञ्चन थालिएको हो । सोमबार नै विशेष शो मार्फत मञ्चन भएको थियो । मंगलबारदेखि बुकिङ शोका रूपमा मञ्चन थालिएको हो ।
विद्यार्थीलाई लक्षित गरेर तयार पारिएको नाटक पुस ६ गतेसम्म पोखरा थिएटरको गन्धर्व नाटकघरमा मञ्चन हुने निर्देशक परिवर्तनले जानकारी दिए । एक चिहान साहित्यकार हृदयचन्द्र सिंह प्रधानले लेखेको उपन्यास हो । प्रधानको उपन्यास एक चिहान पाठ्यक्रम विकास केन्द्रद्वारा कक्षा ११ र १२ को अनिवार्य नेपालीमा समावेश गरिएको छ ।
नेपालका गरिब तथा किसान र मजदुर वर्गको जीवनलाई चित्रित गर्ने यो नाटकमा गरिबी, बाध्यताको परिवेशमा नेवारी समुदायको पारिवारिक अवस्था देखाइएको छ । उपन्यास एक चिहानलाई नाट्य रूपान्तरण तथा निर्देशन परिवर्तनले गरेका छन् । सह–निर्देशन अञ्जु दाहालले गरेको नाटकमा हरिदेवी कोइरालाको असारे गीत समेत समावेश छ ।
