लेखा समितिलाई वास्ता नगरी एनसेल छानविन समिति बनाउनु, भ्रष्टाचार र भ्रष्टाचारी दुवैलाई ढाकछोप गर्ने षडयन्त्र : लेखा समिति सभापति

• लेखा समितिका सभापति ऋषिकेश पोखरेलद्वारा आक्रोस 
• संसदीय समितिहरुमार्फत् विषय बंग्याउने र जनतालाई भ्रम छर्ने कम खेदजनक 
• समितिले थालेको काम अर्को समितिले आफ्नो कार्यक्षेत्रसमेत ख्याल नगरी समिति बनाउनु शंकाको बिषय 

काठमाडौं ।।

प्रतिनिधि सभाको सार्वजनिक लेखा समितिका सभापति ऋषिकेश पोखरेलले एनसेल प्रकरणमा राज्य व्यवस्था तथा सुशासन समितिले पनि छलफल चलाएपछि आक्रोश व्यक्त गरेका छन् । उनले सामाजिक सञ्जालमार्फत् आक्रोश व्यक्त गर्दै भनेका छन्, “सरकारी सुन्ड मुसन्डहरू सार्वजनिक लेखा समितिले गरेको एनसेल भ्रष्टाचार काण्ड सम्बन्धी निर्णयलाई र सरकारलाई दिएको दबाबलाई कमजोर बनाउन र भ्रष्टाचार छोप्न, आफ्नो कार्यक्षेत्रभन्दा बाहिर विभिन्न संसदीय समितिहरुमार्फत् विषय बंग्याउने र जनतालाई भ्रम छर्ने कामको खेद व्यक्त गर्दछु र जनतालाई सचेत हुन अपिल गर्दछु ।”

उनले मंगलबार अर्को समितिले यस विषयमा छलफल चलाएको भन्दै आक्रोश व्यक्त गरे । उनले थप कुरा गर्दै भने, “लेखा समितिले नै यो विषयमा सार्वजनिक गरेर सरकारलाई छानबिन गर्न भन्यो, ३० दिनभित्र छानबिन गरेर यथार्थ विवरण पेस गर्नू भन्यो । कानुनमा लुप होल छन् भने हिउँदे अधिवेशनमा विधेयकमार्फत् नै टाल्ने काम गर्नुपर्छ भनेर स्पष्ट भनेको छ ।” उनले सरकारले भोलिपल्टै समिति बनाएकोमा धन्यवाद पनि भनिसकेको उल्लेख गर्दै भने, “तर एउटा समितिले थालेको काम अर्को समितिले आफ्नो कार्यक्षेत्रसमेत ख्याल नगरी प्रधानमन्त्रीसहितलाई बोलाउने अनि प्रधानमन्त्री त्यहीँ गएर यस्तो प्रस्तुति दिने कुराले सरकारी प्रायोजनमा समिति चल्न थालेको देख्न थालियो । यो भ्रष्टाचार र भ्रष्टाचारी दुवैलाई ढाकछोप गर्ने षडयन्त्र हो ।”

• संसद विघटन