नेपाली कांग्रेसको केन्द्रीय समिति बैठक ‘लाइभ’ नहुने
लाइभ गरेर आफूलाई पारदर्शी नदेखाउने
आज दिउँसो १ बजेबाट पार्टी केन्द्रीय कार्यालय सानेपामा बैठक बस्दै
काठमाडौं ।।
नेपाली कांग्रेसको केन्द्रीय समिति बैठक ‘लाइभ’ नहुने भएको छ । पार्टी प्रचार विभाग प्रमुख मीन विश्वकर्माले प्राविधिक कारण आजको बैठक लाइभ गर्न नसकिने जानकारी दिए । “प्राविधिक कारण आजको बैठक लाइभ गर्न नसकिने भयो,” उनले भने । कांग्रेसले दुई वटा केन्द्रीय समिति बैठक आफ्नो आधिकारिक फेसबुक पेजबाट लाइभ गरेर आफूलाई पारदर्शी देखाउन खोजेको थियो ।
गएको साउन र असोजमा भएको केन्द्रीय समिति बैठक फेसबुक पेजमा लाइभ गरिएको थियो । बैठक लाइभ गरेर वाहवाही कमाएको पार्टीले पुनः प्राविधिक कारण देखाएर बैठक लाइभ नगर्ने तयारी गरेको हो । कांग्रेस केन्द्रीय समिति बैठक आज दिउँसो १ बजेबाट पार्टी केन्द्रीय कार्यालय सानेपामा बस्दैछ ।
