विवाह गर्ने प्रस्ताव अस्वीकार गर्दा महिलाको हत्या गर्ने एक पक्राउ

झापा । विवाह गर्ने प्रस्ताव अस्वीकार गरेपछि झापामा एक महिलाको हत्या भएको खुलेको छ । झापा प्रहरीले हत्यामा संलग्न बिर्तामोड नगरपालिका ८ स्थित गरामनी स्थायी घर भई हाल बिर्तामोड ५ मा डेरा गरी बस्दै आएका ४६ वर्षीय चन्द्रप्रसाद प्रसाईँलाई पक्राउ गरी आइतबार सार्वजनिक गरेको छ । प्रसाईँले अर्जुनधारा नगरपालिका ६ बस्ने ५० वर्षीया माया पुलामी मगरको हत्या गरेको इलाका प्रहरी कार्यालय बिर्तामोडमा डीएसपी सुरज कार्कीले बताए ।

अविवाहित प्रसाईँ कामको सिलसिलामा भारतको आसाम डिब्लुगढमा १७ वर्ष काम गरी २०७२ सालमा बिर्तामोड फर्किएका थिए । उनी बिर्तामोड ५ स्थित हर्कलाल मार्गको दिलु मुखियाको निर्माणाधीन घरमा कामको सिलसिलामा अस्थायी रुपमा बस्दै आएका थिए ।

गत माघ ६ गते प्रसाईँको माया र उनको साथी एन राईसँग बिर्तामोडको पश्चिम स्टेण्डमा भेट भएको थियो । त्यसपछि एन राईले प्रसाईँ र मायाबिच शारीरिक सम्बन्ध राख्न सहमति गराएका थिए । प्रसाईँले मायालाई आफ्नै निर्माणाधीन घरको दोस्रो तलामा लगी एक पटक शारीरिक सम्बन्ध राखेका थिए । त्यसको भोलिपल्ट माघ ७ गते मायासँग राति भेट्ने सल्लाह भएको थियो ।

सोही दिन साँझ प्रसाईँले मायालाई खोज्दै उनी बस्ने ठाउँतिर जाँदा अर्जुनधारा ६ पुलचौकमा मायासँग भेटघाट भई गफगाफ गर्दै बीग ब्रदर लेखिएको व्याटमिन्टन खेल्ने हलको ढोका छेउमा बसी थप कुराकानी गरेका थिए । कुराकानीको क्रममा प्रसाईँले मायालाई विवाह गर्ने प्रस्ताव राखे । मायाले त्यसलाई अस्वीकार गर्दै प्रसाईँको दाहिने आँखामा हातले हिर्काइन । आँखामा चोट लागेपछि प्रसाईँले मार्ने नियत राखी सडकमा रहेको ढुङ्गा टिपी मायाको टाउकोमा पटक पटक प्रहार गरी हत्या गरेको प्रारम्भिक अनुसन्धानको क्रममा खुलेको डीएसपी कार्कीले बताए । प्रसाईँले मायाको हत्या गरी त्यही राखेर फरार भए ।

‘उनले प्रयोग गरेको ढुङ्गा शव रहेको ठाउँबाट उत्तरतर्फको बारीमा फ्याकेको अवस्था भेटिएको थियो,’ डीएसपी कार्कीले भने । घटना भएको पाँच दिनपछि विशेष सूचनाको आधारमा प्रसाईँलाई शनिबार बिर्तामोडबाटै पक्राउ गरी झापा जिल्ला अदालतबाट ७ दिनको म्याद थप गरी अनुसन्धान गरिरहेको उनको भनाई छ ।

• संसद विघटन