सहकारी प्रकरणमा संलग्न नरहेको गृहमन्त्री लामिछानेको दाबी
साझा परिवेश
बुधबार, चैत्र १४, २०८० १६:0९
काठमाडौं । उपप्रधानमन्त्री तथा गृहमन्त्री रवि लामिछानेले सहकारी ठगी प्रकरणमा आफु संलग्न नरहेको दाबी गरेका छन ।
प्रतिनिधि सभाको राज्य व्यवस्था तथा सुशासन समितिको बुधबारको बैठकमा सदस्यहरुले सहकारी ठगीको विषयमा आवाज उठाएपछि गृहमन्त्री लामिछानेले त्यसमा आफ्नो नाममात्र रहेको दाबी गरे ।
आफ्नो दल सरकारमा सहभागी हुनुभन्दा धेरै अघि सहकारी ठगी मुद्दा दर्ता भएकाले यो प्रकरणमा अनुसन्धानका लागि आफु सधैं तयार रहेको उनको प्रतिबद्धता थियो ।
समिति सभापति रामहरी खतिवडाले सहकारी ठगीको विषय बैठकको एजेन्डा नभएको बताएपनि लामिछानेले सांसदहरुले केही कुरा उठान गरेकाले स्पष्ट पार्न आवश्यक रहेको बताए । फरक प्रशंगमा गृहमन्त्री लामिछानेले मेडिकल व्यवसायी दुर्गा प्रसाईंका अंगरक्षकबाट बरामद हतियारबारे अनुसन्धान भइरहेको जानकारी दिए ।
हतियार बोक्ने अनुमति एक जनाले लिएको र बरामद हुँदा अर्को जनाले बोकेर हिडेको पाइएकाले त्यसैमा आधारित रहेको अनुसन्धान भइरहेको उनको भनाइ थियो ।
