देउवा निवास अगाडि फेला परेको शङ्कास्पद वस्तुभित्र माटो भेटियो
साझा परिवेश
आइतवार, भदौ ९, २०८१ १0:४४
काठमाडौँ । नेपाली काँग्रेसका सभापति शेरबहादुर देउवाको धनगढीस्थित निवास अगाडि राखिएको शङ्कास्पद वस्तु विस्फोटक पदार्थ नभएको पुष्टि भएको छ । उक्त शङ्कास्पद वस्तुभित्र माटो भेटिएको प्रहरीले जनाएको छ ।
जिल्ला प्रहरी कार्यालय कैलालीका अनुसार शङ्कास्पद झोलाभित्र बिजुलीबाट चल्ने भाँडो र त्यो भाँडोभित्र माटो भेटिएको छ । आज बिहान देउवा निवास अगाडि कालो रङ्गको पुरानो झोला फेला परेको थियो । त्यो झोला भित्रबाट तार बाहिर निस्किएको देखिएको थियो ।
स्थानीयले त्यो विस्फोटक पदार्थ पनि हुन सक्ने आशङ्काले प्रहरीलाई खबर गरेका थिए । प्रहरीले नेपाली सेनाको टोलीलाई बोलाएको थियो । प्रहरीले शङ्कास्पद वस्तु विस्फोटक पदार्थ नभएको पुष्टि भएको जानकारी दिएको छ । यसबारे थप अनुसन्धान भइरहेको छ ।
