झापामा श्रृंखलाबद्ध रुपमा मोटरसाइकल चोरीका घटना बढेको छ । झापा गाउँपालिका वडा नम्बर ५ राधावस्तीका सूर्यनारायण गणेशको प्र-१-०१-०१२ प ८०५० नम्बरको पल्सर मोटरसाइकल गए राति चोरी भएको हो । घरको दलानमा दुई वटा मोटरसाइकल राखिएकोमा पल्सर मोटरसाइकल चोरी भएको र घरको अन्य सामान चोरी नभएको गणेशले बताए ।
मोटरसाइकल चोरी भएको घटनाबारे प्रहरी चौकी पंथापडामा निवेदन दिएको उनले बताए । पंथापडा चौकीका इन्चार्ज प्रहरी सहायक निरीक्षक वीरबहादुर भण्डारीले चोरी गर्ने व्यक्तिको खोजी तीव्र रुपमा गरिरहेको जानकारी दिएका छन् । त्यस्तै बाह्रदशी गाउँपालिकामा एउटा मोटरसाइकल चोरी भएको छ । पशु सेवा शाखाका प्रमुख देवकुमार यादवले प्रयोग गर्दै आएको प्र-१ ब-१०३२ नम्बरको पल्सर मोटरसाइकल मङ्गलवार राती चोरी भएको छ ।
राजगढ घर भएका यादव बाह्रदशी- ५ स्थित शोभा धमलाको घरमा गाईको उपचार गर्न गएका थिए । रात निकै परेकाले यादव सोही घरमै बसेका थिए । ‘रातको १ बजेसम्म रहेको बाइक बिहान ४ बजे हेर्दा राखेको ठाउँमा थिएन’ यादवले भने । धमला बाह्रदशी कृषि शाखामा कार्यरत कर्मचारी हुन् । उनले मोटरसाइकल चोरी भएको बारेमा प्रहरीमा उजुरी दिएका छन् ।
