हिजो (आइतबार) बिहान पोखरामा दुर्घटनामा परेको यती एयरको विमानको ब्ल्याक बक्स फेला परेको छ ।
दुर्घटनास्थलमा भर्खरै ब्ल्याकबक्स भेटिएको कास्कीका सहायक प्रमुख जिल्ला अधिकारी अनिल शाहीले पुष्टि गरेका छन् । बिहानैदेखि नेपाली सेना, सशस्त्र प्रहरी र नेपाली सेनाले उद्धार कार्य जारी राखेको छ ।
विमान दुर्घटनाबारे जानकारी थाहा पाउने उपकरणलाई ‘ब्ल्याक बक्स’ भनिन्छ । यसमा इन्जिनको आवाज, आपतकालीन अर्लामको आवाज, क्याबिनको आवाज अनि ककपिटको आवाज रेकर्ड हुन्छ ।
यो बक्स एकदमै बलियो धातु टाइटेनियमबाट बनेको हुन्छ, जसलाई आगोले जलाउन सक्दैन । ब्ल्याक बक्स जुनसुकै अवस्थामा पनि सुरक्षित रहन्छ, जसले जहाज दुर्घटनाको बेला के कस्ता आवाज आए भन्ने कुरा रेकर्ड राख्छ ।
आइतबार बिहान भएको विमान दुर्घटनामा मृत्यु भएका ६९ जनाको शव फेला परेको छ । ४ जना चालक दलका सदस्यसहित ७२ यात्रु लिएर काठमाडौंबाट पोखराका लागि उडेको यती एयरको विमान सेती नदीको खोंचमा दुर्घटनामा परेको थियो ।
