काठमाडौं । नेपाल इन्फ्रास्ट्रक्चर बैंक (निफ्रा) ले कर्जा विस्तार गर्दा ब्याज आम्दानीसँगै नाफा पनि बढेको छ । बैंकले आर्थिक वर्ष २०७९- ८० को तेस्रो त्रैमासिक वित्तीय विवरण सार्वजनिक गर्दै १ अर्ब १६ करोड १८ लाख ३८ हजार रुपैयाँ मुनाफा आर्जन गरेको जनााएको छ ।
गत आर्थिक वर्षको सोही अवधिमा ६९ करोड ४५ लाख ५८ हजार रुपैयाँ नाफा कमाएको बैंकको नाफा ६७.२८ प्रतिशतले वृद्धि भएको हो । बैंकको कर्जा विस्तारसँगै खुद ब्याज आम्दानीमा भएको वृद्धिले नाफा बढाउन सहयोग गरेको हो ।
चैत मसान्तसम्म बैंकले ७९ करोड ६६ लाख ५१ हजार निक्षेप संकलन गर्दा २२ अर्ब ८ करोड ४० लाख ६२ हजार रुपैयाँ कर्जा लगानी गरेको छ । बैंकले चैत मसान्तसम्म ऋणपत्र मार्फत २ अर्ब २८ करोड १३ लाख ३ हजार रुपैयाँ स्रोत संकलन गरेको छ ।
गत आर्थिक वर्षको सोही अवधिमा ४० करोड १ लाख ९२ हजार निक्षेप संकलन गर्दा ११ अर्ब ९४ करोड ६६ लाख रुपैयाँ कर्जा लगानी गरेको थियो । बैंकले ऋणपत्र भने जारी गरेको थिएन । एक वर्षको अवधिमा बैंकको निक्षेप ९९.१२ प्रतिशतले वृद्धि हुँदा कर्जा लगानी ८४.८६ प्रतिशतले वृद्धि भएको छ ।
बैंकको कर्जा विस्तारसँगै खुद ब्याज आम्दानी ५५.२२ प्रतिशतले वृद्धि भएको छ । जसले नाफा वृद्धिमा उल्लेख्य योगदान दिएको हो । गत आबको तेस्रो त्रैमासमा १ अर्ब २९ करोड १३ लाख १६ हजार खुद ब्याज आम्दानी गरेको बैंकले चालु आबको सोहि अवधिमा २ अर्ब ४४ लाख २ हजार रुपैयाँ खुद ब्याज आम्दानी गरेको छ । बैंकको कुल सञ्चालन आम्दानी २ अर्ब २ करोड १८ लाख १६ हजार रुपैयाँ पुग्दा सम्भावित कर्जा नोक्सानीका लागि ६ करोड ५० लाख ४७ हजार रुपैयाँ व्यवस्था गरेको छ ।
चैत मसान्तमा बैंकको सञ्चालन मुनाफा १ अर्ब ६५ करोड ९७ लाख ६९ हजार पुगेको छ । गत आबको तेस्रो त्रैमासमा बैंकको सञ्चालन नाफा ९९ करोड २० लाख ४३ हजार रहेको छ । बैंकको नेपाल राष्ट्र बैंकले निर्देशन अनुसारको व्यवस्थापछिको नाफा भने ९१ करोड ६१ लाख १४ हजार रहेको छ ।
२१ अर्ब ६० करोड रुपैयाँ चुक्ता पूँजी रहेको बैंकले उक्त मुनाफा आर्जन गरेको हो । बैंकको जगेडा तथा सञ्चित कोषमा १ अर्ब ९८ करोड ५८ लाख ३० हजार रुपैयाँ छ छ ।
नाफा बढेसँगै बैंकको प्रतिसेयर आम्दानी ४ रुपैयाँ २९ पैसाबाट बढेर ७ रुपैयाँ १७ पैसा पुगेको छ । बैंकको प्रतिसेयर नेटवर्थ १०९ रुपैयाँ १९ पैसा पुग्दा मुल्य आम्दानी अनुपात ३९०.६३ गुणा रहेको छ । बैंकको सम्पत्तीमा प्रतिफल ५.८७ प्रतिशतन छ भने इक्व्ीटीमा प्रतिफल ६.५५ प्रतिशत रहेको छ ।
