काठमाडौं । दीपकराज गिरीका सिनेमाले नेपाली बक्सअफिसमा करिब सय करोडको कारोबार गरेका छन् । दीपकराज गिरीको सिनेमा सम्बन्धी कम्पनी सरस्वती मुभिज प्रा.ली.को ब्यानरमा बनेका उनका हालसम्मका चलचित्रले सय करोडको हाराहारीका कारोबार गरेका हुन् ।
‘वडा नम्बर ६’, ‘६ एकान ६’, र ‘छ माया छपक्कै’ गरेर तीन तथा ‘छक्का पञ्जा’का चारवटा सिरिजसहित सातवटा सिनेमाले नेपाली बक्सअफिसमा सय करोडको हाराहारीमा कारोबार गरेको दीपक बताउँछन् ।
“आमा सरस्वती मुभिजको कम्पनीमा बनेका चलचित्रले करिब सय करोडको हाराहारीमा करोबार गरेको हिसाव आएको छ” दीपकराज गिरीले बाह्रखरीसँग भने, “दर्शकको साथ आजसम्म मिलेको छ ।”
‘वडा नम्बर ६’ उज्जवल घिमिरेले निर्देशन गरेका थिए भने ‘६ एकान ६’ दिनेश डिसीले निर्देशन गरेका हुन् । ‘छ माया छपक्कै’ दीपेन्द्र लामाले निर्देशन गरेका थिए । ‘छक्का पञ्जा’का लगातार तीनवटा सिरिज दीपाश्री निरौलाले निर्देशन गरिन् । ‘छक्का पञ्जा–४’ भने हेमराज बिसीले निर्देशन गरेका छन् ।
‘छक्का पञ्जा’ सिरिज नेपालमा धेरै बक्सअफिस कलेक्सन गर्ने सीमित सिनेमामध्येको एक हो । बक्सअफिस कलेक्सन, डिजिटल राइट्स, ओभरसिज राइट्सलगायतबाट दीपकका सिनेमाले सय करोडको हाराहारीमा कलेक्सन गरेका हुन् । सिनेमाको अर्को आम्दानीको स्रोत युट्युब र डिजिटल प्लेटफर्म (ओटीटी) पनि हो । यसबाहेक दीपकराज गिरीका सिनेमाले आईएमईलगायत केही ब्राण्डबाट स्पोन्सरसमेत पाउने गरेका छन् ।
दीपकले आफ्नो ब्यानर आमा सरस्वती मुभिजको नाम आफ्नी आमाको नामबाट राखेका हुन् ।
दीपकको सिनेमा बनाउने आफ्नै टिम छ । केदार घिमिरे, दीपाश्री निरौलालगायतको टिममा उनी काम गर्दै आएका छन् । उनी प्रायः आफूले बनाउने र खेल्ने चलचित्रको कथा आफैँ लेख्छन् । अरुको कथामा काम गर्नु परे पटकथा र संवादमा आफैँ बस्छन् ।
उनी दर्शकको रुचि अनुसार सिनेमा बनाउनु पर्ने बताउँछन् । आफ्ना लागि दर्शक नै समीक्षक भएको उनले बताउने गरेका छन् ।
