भ्रष्टाचारीलाई जोगाउने प्रयासमा सरकार नलागेको, पाँच वर्ष चल्छ : प्रधानमन्त्री प्रचण्ड
साझा परिवेश
सोमवार, बैशाख १८, २०८० १३:१२
काठमाडौं । प्रधानमन्त्री पुष्पकमल दाहाल ‘प्रचण्ड’ले वर्तमान सरकार पाँच वर्ष चल्ने दाबी गरेका छन् ।
सोमबार चितवनमा प्रेस सेन्टर नेपालले आयोजना गरेको पत्रकार सम्मेलनमा प्रधानमन्त्री प्रचण्डले भने, “सरकार यताउता हुने कुरा भ्रम हो । वर्तमान सरकार पाँच वर्ष चल्छ ।”
उनले रास्वपाले वर्तमान सरकारलाई दिएको समर्थन फिर्ता नहुने र रास्वपालाई सरकारमा ल्याउन सकारात्मक कुराकानी भइरहेको बताए ।
प्र्रधानमन्त्री प्रचण्डले भ्रष्टाचारीलाई जोगाउने प्रयासमा सरकार नलागेको भन्दै न्यूनतम साझा कार्यक्रममा समेत भ्रष्टाचार अन्त्य गर्नका लागि प्रतिबद्धता जनाइएको जानकारी दिए ।
उनले महावीर पुन आफूसँग सल्लाहनै गरेर माइतीघरमण्डलामा धर्नामा बसेको बताए । धर्ना अघि आफूसँग बालुवाटारमा भेटेको जनाउँदै उनले पुनले उठाएका मागप्रति सरकार सकारात्मक रहेको बताए ।
त्यस्तै, प्रधानमन्त्री प्रचण्डले अयोग्य लडाकुलाई रकम दिने विषय विसं २०७१ को सरकारले गरेको निर्णय भएको बताए । “अयोग्य लडाकुका बारेमा अदालतको फैसलालाई कार्यान्वयन मात्रै गर्न खोजेको हो,“ उनले भने ।
