भारतीय फिल्मलाई रोक लगाउने काठमाडौं महानगरपालिकाको निर्णयविरुद्धको मुद्दा न्यायाधीश धीरबहादुर चन्दको एकल इजलासमा परेको छ । चलचित्र संघको तर्फबाट प्रीतम घिमिरेले काठमाडौं महानगरविरुद्ध बिहीबार उच्च अदालत पाटनमा निषेधाज्ञा आदेश माग गर्दै रिट दायर गरेका थिए ।
भारतीय फिल्मलाई रोक लगाउने निर्णयविरुद्ध मुद्दा
चलचित्र संघको तर्फबाट प्रीतम घिमिरेले रिट दायर गरेका थिए
मुद्दा न्यायाधीश चन्दको इजलासमा परेको छ
संघको तर्फबाटका कानुन व्यवसायी जयलाल भण्डारीले यो मुद्दामा आजै आदेश आउन सक्ने सम्भावना रहेको बताए । उनका अनुसार यो मुद्दामा मेयर बालेन शाह, नगर प्रहरी, गृह मन्त्रालय र सञ्चार, सूचना तथा प्रविधि मन्त्रालयलाई विपक्षी बनाएर मुद्दा दायर गरिएको थियो ।
मेयर शाहको निर्देशनमा सोमबारदेखि काठमाडौं महानगर क्षेत्रभित्रका सिनेमा हलमा भारतीय फिल्मको प्रदर्शन रोकिएको थियो । उनको निर्णयको सिको गर्दै पोखरा महानगरपालिका र धरान उपमहानगरपालिकालगायतले पनि आदिपुरुषमा समावेश डायलग नसच्चाएसम्म भारतीय फिल्म रोक्ने निर्णय गरेका थिए ।
यसैबीच मेयर शाहविरुद्ध नागरिक उड्डयन प्राधिकरणले दायर गरेको प्रतिषेध मुद्दा पनि न्यायाधीश चन्दकै इजलासमा परेको छ ।
