बैठक रोकिँदा जनताको आवाज अवरुद्ध हुने भन्दै बैठक बस्न सभामुखको आह्वान

• प्रधानमन्त्री र अध्यक्ष केपी शर्मा ओलीलाई सभामुखको फोन
• कार्यव्यवस्था परामर्श समितिको बैठक आह्वान
• आज दिउँसो १२ बजे बानेश्वरमा बस्ने

काठमाडौं ।।

प्रतिनिधिसभाका सभामुख देवराज घिमिरेले प्रधानमन्त्री पुष्पकमल दाहाल ‘प्रचण्ड’ र प्रमुख प्रतिपक्ष दल नेकपा (एमाले) का अध्यक्ष केपी शर्मा ओलीसित टेलिफोन संवाद गरेका छन् । आज बिहान उनले नेताद्वयलाई फोन गरेका हुन् ।

त्यसक्रमा उनले निरन्तर संसद् बैठक रोकिँदा जनताको आवाज अवरुद्ध हुने भन्दै गम्भीर हुन प्रधानमन्त्री र प्रतिपक्ष दलका नेताको ध्यानाकर्षण गराएका सभामुखको सचिवालयले जानकारी दिएको छ । “सम्माननीयज्यूले सूचना टाँसेर सदन स्थगित गर्दा संसदीय अभ्यासमा गलत नजिर बस्नेतर्फ समेत स्मरण गराउनुभयो,” सचिवालयले भनेको छ ।

त्यसपछि सभामुख घिमिरेले सदनको अवरोध खुलाउने विषयमा छलफल गर्न कार्यव्यवस्था परामर्श समितिको बैठक बेलाएका छन् । आज दिउँसो १२ बजे बानेश्वरमा बस्ने गरी कार्यव्यवस्था परामर्श समितिको बैठक आह्वान गरिएको सचिवालयले जनाएको छ ।

संसद्को अवरोध अन्त्य गर्ने विषयमा हिजो पनि सभामुखले प्रधानमन्त्री, विपक्षी दलका नेता, गृहमन्त्री, प्रमुख सचेतक र सचेतकहरूसँग छलफल गरेका थिए ।

• संसद विघटन