धरानमा कार्यरत इन्टर्न डाक्टर काम छाडेर आन्दोलनमा उत्रिए
उनीहरूको माग प्रतिष्ठानले सम्बोधन नगरेपछि….
मासिक २४ हजार रुपैयाँ जीवन निर्वाह भत्ता पाउनुपर्ने माग
विराटनगर ।।
वीपी कोइराला स्वास्थ्य विज्ञान प्रतिष्ठान धरानमा कार्यरत इन्टर्न डाक्टर काम छाडेर आन्दोलनमा उत्रिएका छन् । जीवन निर्वाह भत्ता वृद्धिको माग गर्दै आएका उनीहरूको माग प्रतिष्ठानले माग सम्बोधन नगरेपछि काम छाडेर आन्दोलनमा उत्रिएका हुन् । प्रतिष्ठानमा १३० जना इन्टर्न डाक्टर कार्यरत छन् । ती डाक्टरले साउन ३१ बाट डिउटी छाडेर आन्दोलनमा उत्रिएका हुन् ।
प्रतिष्ठानले जीवन निर्वाह भत्ता बापत इन्टर्न गरिरहेका डाक्टरलाई मासिक १८ हजार ३ सय रुपैयाँ उपलब्ध गराउँदै आएको छ । उक्त भत्ता ३ वर्षयता बढेको छैन । महंगी अनुसार न्यूनतम जीवन निर्वाह भत्ताको वृद्धिको मागसहित शान्तिपूर्ण आन्दोलन गर्दा सम्बोधन नभएपछि काम छाडेर आन्दोलनमा उत्रिन बाध्य भएको आन्दोलनरत चिकित्सक मध्येका एक डाक्टर प्रशान्त राईले बताए ।
उनले भने, ‘ महंगी अनुसार मासिक २४ हजार रुपैयाँ जीवन निर्वाह भत्ता पाउनुपर्छ । तर हाम्रो माग शान्तिपूर्ण रुपले सम्बोधन भएन । त्यसकारण बाध्य भएर हामी आन्दोलनमा उत्रिनु परेको हो ।’ उनका अनुसार गत असार १ गतेदेखि आन्दोलनमा थिए । तर, प्रतिष्ठानले माग सम्बोधन गर्न चासो नदेखाएपछि साउन ३१ गतेबाट काम छाडेर आन्दोलन सुरु गरेको डाक्टर राईले बताए ।
प्रतिष्ठानले श्रमशोषण गरेको गुनासो गर्दै चिकित्सकहरुले माग सम्बोधन नभएसम्म काममा नफर्किने चेतावनी दिएका छन् । प्रतिष्ठानमा कार्यकारिणी समिति र सञ्चालक परिषद्को बैठकले तलब भत्ता वृद्धि गर्न सक्छ । २०७७ साल मंसिरमा प्रतिष्ठानको शिक्षक कर्मचारीको तलब वृद्धि गर्दा इन्टर्न डाक्टरहरुको पनि जीवन निर्वाह भत्ता वृद्धि गर्ने सम्झौता भएको थियो ।
सम्झौतापछि शिक्षक कर्मचारीको १५ प्रतिशत तलब भत्ता वृद्धि भए पनि इन्टर्न डाक्टरको जीवन निर्वाह भत्ता वृद्धि भएको नभएको आन्दोलनरत चिकित्सकहरुको गुनासो छ ।
