अस्पताल जाँदा धेरै झन्झट् भाेग्नुपरेकाे खातुनको गुनासो
कानुनकाे अझै प्रभावकारी कार्यान्वयन हुनुपर्यो
काठमाडाैं ।।
तेजाब पीडित मुस्कान खातुनले नेकपा एमालेका अध्यक्ष एवं पूर्वप्रधानमन्त्री केपी शर्मा ओलीलाई धन्यवाद दिनुभएकाे छ । तेजाब आक्रमण विरुद्धकाे जागरण दिवसकाे अवसरमा एमाले केन्द्रीय कार्यालय कार्यालय च्यासलमा साेमबार आयाेजित कार्यक्रममा खातुनले तेजाब पीडितका लागि कडा कानुन ल्याएकाे भन्दै पूर्व प्रधानमन्त्री ओलीलाई धन्यवाद दिनुभयाे ।
पीडितकाे पीडा सुनेर १५ दिनभित्र कानुन ल्याउनु ठूलाे कुरा भएकाे भन्दै उहाँले याे गर्व गर्न लायक कुरा भएकाे बताउनुभयाे । ‘बालाई एकदमै धन्यवाद भन्न चाहान्छु, उहाँले हाम्राे पीडा सुनेर कानुन ल्याउनुभयाे, १५ दिनभित्रै कानुन ल्याउनु भनेकाे एकदमै ठूलाे काम हाे, एकदमै गर्व गर्न लायक काम हाे, मलाई जहाँसम्म लाग्छ नेपालमा १५ दिनभित्रै कानुन आएकाे भनेकाे सायद तेजाबसम्बन्धी कानुन पहिलाेपटक हाे’- खातुनले भन्नुभयाे ।
कानुन बनेपनि पीडितहरु औषधि लिन अस्पताल जाँदा धेरै झन्झट् भाेग्नुपरेकाे भन्दै उहाँले यसका लागि सहजीकरण गरिदिन आग्रह गर्नुभयाे ।औषधि लिनका लागि अस्पताल जाँदा १० वटा प्रमाणपत्र बुझाउनुपर्ने भन्दै खातुनले यसका लागि कुनै परिचयपत्र (कार्ड) काे व्यवस्था गरिदिन आग्रह गर्नुभयाे । कतिपय ठाउँमा तेजाब पीडितलाई जागिर दिने भनेपनि नदिइएकाे पाइएकाे भन्दै उहाँले कानुनकाे अझै प्रभावकारी कार्यान्वयन हुनुपर्ने बताउनुभयाे ।
