तीनकुने हत्याकाण्डमा प्रयोग भएको हतियार प्रहरीले फेला पार्यो
साझा परिवेश
आइतवार, भदौ ३१, २०८० १0:३१
काठमाडौँ। काठमाडौंको तीनकुनेमा एकै परिवारका तीनसहित चार जनाको हत्यामा प्रयोग भएको हतियार प्रहरीले फेला पारेको छ ।
उपत्यका अपराध अनुसन्धान कार्यालय र जिल्ला प्रहरी परिसर, टेकुको टोलीले घटना भएको स्थानमा हत्यामा प्रयोग भएको खुकुरी र अर्को एक धारिलो हतियार बरामद गरेको हो । खुकुरी र चुलेसी जस्तो घरमा प्रयोग भएको घरेलु हतियार प्रयोग गरेर आक्रमण गरेको पाइएको छ ।
शुक्रबार राती ११ः५५ बजे तीनकुनेस्थित दिव्य सःमिलमा चार जनाको हत्या भएको थियो । हत्याको सूचना पाएपछी प्रहरीले अनुसन्धान शुरु गरेको थियो ।
लगत्तै घटनास्थलमा पुगेको उपत्यका अपराध अनुसन्धान कार्यालय र जिल्ला प्रहरी परिसर, टेकुको टोलीले चार जनाको शव भेटेको थियो । मिलमा सुरक्षागार्डका रुपमा कार्यरत कुमार भुजेल, उनकी श्रीमती अम्बिका भुजेल, आमा शुभद्रा भुजेल र मोरङका नविन राईको टाउको र शरीरको विभिन्न भागमा चोट लागेको पाइएको थियो ।
प्रहरीले राति अपराधमा प्रयोग भएको हतियार बरामद गरेको थिएन । शनिबार घटनास्थलको सर्च अप्रेशनका क्रममा हतियार फेला परेको हो ।
