काठमाडौं मेडिकल कलेजका डाक्टरलाई बिरामीद्वारा नै हातपात
साझा परिवेश
आइतवार, अशोज १४, २०८० १४:३९
काठमाडौं मेडिकल कलेजमा इन्टर्न डाक्टरमाथि हातपात
ओपीडी मै आएका बिरामीले कुटपिट गरे
अस्पताल अगाडि सडकमा बसेर डाक्टरहरु धर्ना गर्दै
काठमाडौं ।।
सिनामंगलस्थित काठमाडौं मेडिकल कलेजमा इन्टर्न डाक्टरमाथि हातपात भएको छ । आइतबार दिउँसो साढे १२ बजेतिर इन्टर्न डाक्टर मनिष खड्कामाथि आक्रमण भएको अस्पताल प्रबन्धक नारायणप्रसाद दाहालले जानकारी दिए । उनका अनुसार मिर्गौला रोगको परीक्षणका लागि बहिरंग सेवा (ओपीडी) मा आएका बिरामीले कुटपिट गरेका हुन् ।
‘बिरामीले एक विशेषज्ञको नाम लिएर देखाउन आउनुभएको रहेछ । तर, ती विशेषज्ञ क्लासमा हुुनुहुँदो रहेछ । इन्टर्न डाक्टरले हल्ला नगर्नुहोस्, उहाँ क्लास लिन जानुभएको छ । एकछिन समय लाग्छ भनेपछि कुटपिट भएको रहेछ’, दाहालले भने । उक्त घटनामा संलग्नको आरोपमा प्रहरीले रुपक गौतम सरोज गौतमलाई पक्राउ गरेको छ ।अहिले अस्तपालका चिकित्सक, स्वास्थ्यकर्मी अस्पताल अगाडि सडकमा बसेर धर्ना दिइरहेका छन् ।
