१९ औ एसियाली खेलकुदमा नेपालले पहिलोपटक करातेबाट रजत पदक
चीन /
चीनमा जारी १९ औ एसियाली खेलकुदमा नेपालले पहिलोपटक करातेबाट रजत पदक जितेको छ। नेपालकी एरिका गुरुङले करातेमा ऐतिहासिक रजत पदक नेपाललाई दिलाउन सफल भएकी हुन्।
उनी १०औं विश्व सितोरियो करातेकी स्वर्ण पदक विजेता खेलाडी हुन्। उनले उत्कृष्ट प्रदर्शन गर्दै ऐतिहासिक पदक जितेको नेपाल कराते महासंघले जनाएको छ। ६८ केजी तौल समूहको फाइनल प्रतिस्पर्धामा उनले जित हासिल गरेको खण्डमा नेपाललाई पहिलो स्वर्णपदक दिलाउने खेलाडी बन्ने थिइन्।
उनलाई काजकिस्तानकी बेरुल्टसेवा सोफियाले ३–० ले पराजित गरेपछि उनी रजतमा सीमित भएकी हुन्। नेपालले अहिलेसम्म एसियन गेम्समा स्वर्ण जितेको छैन। एसियाडमा नेपाललाई पहिलो रजत पदक तेक्वान्दोकी सविता राजभण्डारीले दिलाएकी थिइन्। १९९८ मा थाइल्यान्डको बैंककमा भएको एसियाडमा उनले रजत जितेकी थिइन्। अहिलेसम्म नेपालले १९औं एसियाली खेलकुदमा एक रजत र एक कास्य पदक जितेको छ। महिला कवड्डीतर्फ नेपालले कास्य पदक जितेको हो।
एरिकाले सेमिफाइलनमा हङकङकी यान काई होलाई ८–४ अंकको अन्तरले हराउँदै फाइनलको यात्रा तय गरेकी थिइन् भने क्वार्टरफाइलनमा उनले जापानकी युजुकी सावाएलाई १–१ को खेल खेले पनि पहिले अंक जोडेका आधारमा जित निकालेकी थिइन्।
पदक तालिकाको वरीयतामा नेपाल ३३औं स्थानमा छ। ओमन, बंगलादेश, इराक, ब्रुनाइ, दारुसलाम पनि समान पदकसहित ३३औं स्थानमा नै रहेका छन्।
भारतले अहिलेसम्म सर्वाधिक पदक जितेको छ। उसले २८ स्वर्ण, ३६ रजत र ४१ कास्य गरी कुल १०५ पदक जितेको छ। श्रीलंकाले १ स्वर्ण, २ रजत र २ कास्य गरी कुल ५ पदक जितेको छ। अफगानिस्तानले पनि १ रजत र ४ कास्य जितेको छ। पाकिस्तानले १ रजत २ कास्य जितेको छ। माल्दिभ्स र भुटानले अहिलेसम्म पदक जितेका छैनन् ।
