शुभकामना दिँदै खनालले देश अनेक खालका संकटमा रहेको बताए

• देश अनेक खालका संकटमा, देशमा मूल्यवृद्धि 
• कसरी पर्व मनाउने भन्ने प्रश्न खडा भए पनि खुसीका साथ मनाउनुपर्ने
• दलाल पुँजीवादी व्यवस्थाले गर्दा समस्या सिर्जना

काठमाडौं ।।

नेकपा (एकीकृत समाजवादी) का सम्मानित नेता झलनाथ खनालले देश अनेक खालका संकटबाट अघि बढिरहेको बताएका छन् । दसैँ, तिहार, छठ, नेपाल सम्वतको अवसरमा उनले भिडियो सन्देश दिँदै देशमा राजनीतिक, सामाजिक संकट रहेको बताए । “देश विभिन्न कारणले अनेक खालका संकटहरूबाट अघि बढिरहेको छ,” खनालले भने, “राजनीतिक, आर्थिक, समाजिक सांस्कृतिक संकट, राष्ट्रियताको संकट बढिरहेको छ ।” उनले महँगीका कारण कसरी पर्व मनाउने भन्ने प्रश्न खडा भए पनि खुसीका साथ मनाउनुपर्ने बताए ।

“देशमा मूल्यवृद्धि भएको छ । महँगी बढिरहेको छ । यस्तो अवस्थामा समुदायका लागि चाडपर्वहरू कसरी मनाउने होला भन्ने सामना गर्नुपर्ने परिस्थिति बनिरहेको छ,” उनले भनेका छन्, “जुनसुकै अवस्थामा भए पनि आइरहेको चाडपर्व वास्तवमा खुसीयाली पर्व हो । खुसी साटासाट गर्दै मनाउनुपर्छ ।” दलाल पुँजीवादी व्यवस्थाले गर्दा समस्या सिर्जना भइरहेको उनको ठम्याइ छ । “देशको दलाल पुजिँवादी व्यवस्थाले गर्दा सिर्जना भइरहेका विकृति हटाउनका लागि तपाईं हामीले एउटा सुन्दर समाजको निर्माण गर्नुपर्छ । समाजवादी समाजको निर्माण गर्नुपर्दछ,” उनी भन्छन् । जनता अघि बढ्दै गरेकाले एकदिन सभ्य, सुन्दर समाज बन्न सक्ने विश्वास पनि उनको छ ।

• संसद विघटन