काठमाण्डाै – जाजरकोटका भूकम्प पीडितहरुले अझै पनि राहत नपाएको गुनासो गरेका छन् ।
परिवारका चार सदस्य गुमाउनुभएका नलगाड नगरपालिका–६ गराग्लीका शेरबहादुर रावलले अहिले शोकसँगै गाउँमा भोक पनि शुरु भएको बताउनुभयो । मानिस मरेको शोकसँगै रात कटाउन छानो र पेट भर्नका लागि खाना नपाएर गाउँमा समस्या आएको उहाँको भनाइ छ ।
नलगाड नगरपालिकामा सात हजारभन्दा बढी पालको आवश्यक पर्ने भए पनि अहिलेसम्म दुई सय ५० मात्र पुगेको नगरपालिकाको योजना शाखाका प्रमुख नारायण खत्रीले बताउनुभयो । नगरपालिकाले सक्दो प्रयास गरिरहेको भए पनि आफूहरुको क्षमताभन्दा माथिको समस्या आएको नलगाडका मेयर डम्बर रावतले बताउनुभयो ।
नलगाड नगरपालिकामा ५४ जनाको ज्यान गएको छ भने ६८ जना घाइते भएका छन् । यस्तै, बारेकोट गाउँपालिका अध्यक्ष वीरबहादुर गिरीले पनि राहत नपुग्दा समस्या भएको बताउनुभयो । धेरै घर नढलेका भए पनि बस्न नमिल्ने भएकाले स्थानीयलाई समस्या भएको उहाँले बताउनुभयो ।
गएराति पनि बालबालिका, सुत्केरी, वृद्धवृद्धा तथा बिरामीहरु पनि खुल्ला आकाशमै बस्न बाध्य भएका छन् । राहत सामग्री प्राप्त हुने र प्रभावित क्षेत्रमा पठाउने काम भइरहेकोले आजदेखि सबै क्षेत्रमा राहत वितरण हुने जिल्ला प्रशासन कार्यालय जाजरकोटले जनाएको छ ।
रुकुम पश्चिममा पनि आजदेखि राहत वितरण थप तीव्र हुने जिल्ला प्रशासन कार्यालय रुकुम पश्चिमले जनाएको छ । गएको शुक्रवार रातिको भूकम्पका कारण एक सय ५७ जनाले ज्यान गुमाएका छन् । सबैको शव आफन्तहरुले बुझिसकेका छन् ।
