भद्रपुरमा धनीपूर्जाका लागि दुई हजार बढीको निवेदन, दुई सय ४५ ले पाए नाप नक्साको निस्सा

भद्रपुर, २१ कात्तिक । राष्ट्रिय भूमि आयोगले भद्रपुर नगर क्षेत्रका भूमिहीन सुकुम्बासी र अव्यवस्थित बसोबासीलाई नाप नक्साको निस्सा वितरण शुरु गरेको छ ।

भद्रपुर नगरपालिका मार्फत संकलन गरिएको भूमिहीन सुकुम्बासी र अव्यवस्थित बसोबासी मध्ये आयोगले आइतबार पहिलो चरणमा वडा नम्बर १ र २ का दुई सय ४५ जनालाई नाप नक्साको निस्सा वितरण गरेको हो ।

वडा कार्यालयहरूमा आयोजित कार्यक्रमका बीच वडा नम्बर १ का ४० जना भूमिहीन सुकुम्बासी, १४ जना भूमिहीन दलित र ४२ जना अव्यवस्थित बसोबासीलाई निस्सा वितरण गरिएको छ । त्यस्तै वडा नम्बर २ का १८ जना भूमिहीन सुकुम्बासी र एक सय ३१ जना अव्यवस्थित बसोबासीलाई निस्सा वितरण गरिएको छ । उनीहरूलाई राष्ट्रिय भूमि आयोगका अध्यक्ष केशव निरौला, आयोगका जिल्ला अध्यक्ष तिलकसिंह पाण्डे, भद्रपुर नगर प्रमुख गणेश पोखरेल लगायतले निस्सा वितरण गरेका थिए ।

नगर क्षेत्रका दुई हजार ७० परिवारले लालपुर्जाका लागि नगरपालिकामा निवेदन दर्ता गराएका छन् । जसमा भूमिहीन सुकुम्बासी नौ सय दुई, दलित भूमिहीन ९१ र अव्यवस्थित बसोबासी एक हजार २८ जना रहेको नगरपालिकाका सूचना अधिकारी नेत्र पोखरेलले जानकारी दिए ।

दुई हजार ७० मध्ये ४९ जनाको निवेदन अपूर्ण रहेको उनको भनाइ छ । करिब २९ सय परिवारले सम्बन्धित वडाहरूमा निवेदन दर्ता गराए पनि मापदण्ड नपुगेकाहरूलाई हटाइएको उनले बताए ।

• संसद विघटन