तिहारमा माटामा पाला लगायतका भाँडाहरु मागअनुसार बनाउन समय मिलेन
माटो अभावका कारण पाला बनाउन समस्या
काठमाडौं ।।
तिहार लागेसँगै भक्तपुरमा माटोको पाला बनाउन प्रजापति समुदायलाई भ्याईनभ्याइ छ । दशैँ सकिएसँगै तिहारको समय आएपछि भक्तपुरका प्रजापति समुदायलाई माटाका पाला तथा भाँडा बनाउन भ्याईनभ्याइ भएको हो । उनीहरुले यो वर्षको तिहारमा माटामा पाला लगायतका भाँडाहरु मागअनुसार बनाउन नसकेको बताए । अन्य समयमा भन्दा तिहारको समयमा धेरै माग हुने गरेको व्यवसायीहरु बताउँछन् । भक्तपुर नगरपालिका-४ का गणेशकुमार प्रजापतिले बजारमा प्लास्टिकका दियोहरु आएकाले माटोका पालाहरुको माग कम भएको जनाए । व्यवसायी प्रजापतिले माटोको पाला बनाउनसके बजारमा माग धेरै रहेको जनाए ।
उनले प्लास्टिकका दियोहरु बजारमा आएकाले माटोका पाला व्यवसायमा समस्या भने आएको उल्लेख गरे । उनले माटो अभावका कारण पाला बनाउन समस्या भएको जनाए । विगतमा माटो किन्नु नपर्ने भएपनि अहिले माटोसमेत किन्नुपर्ने अवस्था रहेको उनको भनाइ छ । ‘पहिला पहिला माटो किन्नु पर्दैन थियो । अहिले किन्नु पर्छ । बजार मूल्य बढेको छैन । त्यसैले माटो पनि किन्नु पर्दा केही मर्का परेको छ,’ उनले भने । प्रजापतिले माटो किन्नुपर्ने भएकाले पाला लगायतका माटोका भाँडा बनाउने पेशा संकटमा परेको जनाए ।
उनले पाला मात्र नभएर माटोका भाँडा बनाउँदा विशेषगरी माटोको समस्या तथा माटोका भाँडाहरु पोल्ने स्थानको अभाव रहेको दुःखेसो गरे । उनले माटोको पाला ठूलो भाँडा बनाउन नजान्नेहरुले बाह्रै महिना बनाउने तर धेरैले दशैँ सकिने बित्तिकै बनाउन सुरु गर्ने गरेको जानकारी दिए । भक्तपुरका प्रजापति समुदायले बनाएको माटोको पाला उपत्यका तथा बाहिर निकै परिचित छ । मौलिक परिचयका कारण उपत्यका बाहिर सिन्धुपाल्चोक, पोखरा, काभ्रे, धरान लगायत विभिन्न जिल्लाबाट समेत भक्तपुरसम्म पाला किन्न आउने गरेका छन् । माटोको पाला लक्ष्मी पूजाको दिन धेरै प्रयोग हुने गर्छ ।
