संघीयताको कानुन छिटो निर्माण गर्नुपर्छ : नेता सिंह
साझा परिवेश
शुक्रबार, कार्तिक २४, २०८० १२:0३
नेपाली कांग्रेसका नेता प्रकाशमान सिंह
संघीयतासम्बन्धी सबै कानुन छिटो निर्माण गर्नुपर्ने
नेपाली जनतालाई अधिकार दिलाउने काममा खेलेको भूमिका प्रसंशनीय
काठमाडौं ।।
नेपाली कांग्रेसका नेता प्रकाशमान सिंहले संघीयतासम्बन्धी सबै कानुन छिटो निर्माण गर्नुपर्ने बताएका छन् । ०४६ सालको जनआन्दोलनका सर्वोच्च कमान्डर गणेशमान सिंहको १०९औँ जन्मजयन्तीका अवसरमा शुक्रबार शोभाभगवतीस्थित उनको सालिकमा माल्यार्पण गरेपछि नेता सिंहले यस्तो बताएका हुन् । संविधानको भावना र मर्मअनुरूप कानुन निर्माण गरिए मात्र नेपाली जनताको चाहनाअनुसार संघीय, प्रदेश र स्थानीय तहका सरकारले काम गर्न सक्ने वातावरण बन्ने उनले उल्लेख गरे ।
गणेशमान सिंहले दिएको आर्थिक क्रान्तिको खाकाअनुसार अघि बढ्न सके नेपाली जनताको चाहनाअनुसार मुलुकलाई अघि बढाउन सकिने उनको भनाइ छ । प्रजातान्त्रिक आन्दोलनमार्फत नेपाली जनतालाई अधिकार दिलाउने काममा गणेशमान सिंहले खेलेको भूमिकाको समेत उनले चर्चा गरे ।
