शान्ति स्थापनार्थ सिरियामा तैनाथ नेपाली सेनाको अदलीबदली भएको छ । संयुक्त राष्ट्रसंघको आह्वानमा ‘युनाइटेड नेशन्स डिसइन्गेजमेण्ट अवजर्भर फोर्स’ मा खटिएको टोलीलाई फर्काएर अर्को डफ्फा पठाईएको हो ।
प्रमुख सेनानी सुनिलकुमार मल्लको कमाण्डमा टोली मिसन इलाकातर्फ गएराति प्रस्थान गरेको छ । टोलीमा २३७ जना छन् ।
इथोपियन एअरलाइन्सको उडान नम्बर ईटी८८०१ बाट काठमाडौंबाट दिल्ली हुँदै सिरिया गएको टोलीमा श्री फोर्स हेडक्वार्टर सपोर्ट युनिट १२ औं डफ्फाका १३० जना, श्री हनुमाध्वज गुल्म सातौं डफ्फाका ६८ जना, श्री इञ्जिनियर से.मु. आठौं डफ्फाका सात जना, श्री लेवल अस्पताल पाँचौं डफ्फाका २० जना, श्री क्लोज प्रोटेक्सन युनिट तेस्रो डफ्फाका नौं जना र बिदामा बसेर जाने गरी तीन जना रहेका छन् ।
त्यसैगरी, मिसनमा तैनाथ सेनाको एउटा टोली स्वदेश फर्किएको छ । इथोपियन एअरलाइन्सको उडान नम्बर ईटी८८०२ को विमान बेइरुट हुँदै काठमाडौं आइपुगेको हो ।
सेनानी देव गुरुङ्गको कमाण्डमा १६१ जनाको टोली हिजो आएको बताइएको छ ।
