अध्यक्ष नगेन्द्र देउजालाई रिहाइ नगरे कठोर कदम चाल्ने
साझा परिवेश
आइतवार, मंसिर १०, २०८० १२:५४
सरकारसँग अध्यक्ष नगेन्द्र देउजाको रिहाइ माग
मोर्चाले विज्ञप्ति जारी गरी माग गर्यो
स्वतन्त्र रूपमा हिँडडुल गर्न पाउने अधिकारको सुनिश्चित गर्न अनुरोध
काठमाडौँ।।
राप्रपा नेपालनिकट राष्ट्रिय युवा मोर्चा नेपालले आफ्ना अध्यक्ष नगेन्द्र देउजालाई आज (आइतबार) बेलुकासम्म रिहा नगरिए कठोर कदम चालिने चेतावनी दिएको छ। अध्यक्ष देउजालाई सरकारले यही मंसिर ८ गते पक्राउ गरी थुनामा राखिएको मोर्चाले जनाएको छ। ‘बिनाकारण बाटोमा हिँडिरहेको अवस्थामा पक्राउ गरी हालसम्म थुनामुक्त नगरेको हुँदा तत्काल उहाँको निःसर्त रिहाइको माग गर्दै नागरिकको स्वतन्त्र रूपमा हिँडडुल गर्न पाउने अधिकारको सुनिश्चित गर्न
राष्ट्रिय युवा मोर्चा नेपाल सरकारसँग माग गर्दछ’, मोर्चाले विज्ञप्ति जारी गरी भनेको छ, ‘आज बेलुकासम्म मोर्चाका अध्यक्ष देउजालाई थुनामुक्त नगरिए जुनसुकै कठोर कदम चाल्न मोर्चा बाध्य हुने र यसबाट उत्पन्न परिस्थितिको जिम्मेवार सरकार स्वयं हुनेसमेत जानकारी गराउँदछौँ।’ मंसिर ८ गते स्थानीय प्रशासनले निषेध गरेको काठमाडौँको तीनकुनेमा गणतन्त्रविरोधी अभियन्ता दुर्गा प्रसाईंका समर्थक जबर्जस्ती जाँदा प्रहरीले केही व्यक्तिलाई पक्राउ गरेको थियो।
