बिर्तामोड । नेकपा एमाले झापाको ११औं जिल्ला अधिवेशन आजदेखि सुरु हुने भएको छ । चैत १५ र १६ गते बिर्तामोडस्थित अग्रसेन भवनमा हुने अधिवेशनले नयाँ नेतृत्व चयन गर्ने छ ।
११ औं जिल्ला अधिवेशनको उद्घाटन एमाले अध्यक्ष तथा पूर्व प्रधानमन्त्री केपी शर्मा ओलीले गर्ने छन् । त्यसका लागि अध्यक्ष ओली बुधवार नै झापा आइसकेका छन् । पार्टी अध्यक्ष ओलीको गृह जिल्लामा हुने जिल्ला अधिवेशनलाई सबैले महत्वका साथ हेरेका छन् । ओलीले ११ बजे अधिवेशनको उद्घाटन गर्ने समय तालिका मिलाइएको छ । अधिवेशनका लागि आवश्यक व्यवस्थापन मिलाइसकेको बताइएको छ ।
अधिवेशनको बन्द सत्रमा कार्यवाहक अध्यक्ष प्रेमबहादुर गिरीले राजनीतिक प्रतिवेदन, सचिव शिव ढुङ्गेलले सांगठानिक प्रतिवेदन प्रस्तुत गर्ने बताइएको छ । पालिकाबाट ४३० जना, जनसङ्गठनहरूबाट ८९ जना, मजदुरबाट ३० जना, सल्लाहकारहरू २५ जना, सम्पर्क मञ्चबाट ५ जना र आयोजक १६९ जना एवम् मनोनीत प्रतिनिधिहरू ३८ जना गरी ७८६ जनाले अधिवेशनमा सहभागी हुने जिल्ला कमिटीले जनाएको छ ।
एमाले झापाको अध्यक्षमा प्रेम गिरी र शिव ढुङ्गेल आकाङ्क्षी रहेका छन् । हालका कार्यवाहक अध्यक्ष गिरी र सचिव ढुङ्गेलले अध्यक्ष बन्ने आकाङ्क्षा व्यक्त गरिरहेका छन् । गिरी र ढुङ्गेल दुवै जना अध्यक्षको उम्मेदवार बन्ने लगभग निश्चित भएको छ ।
