धरानबाट चोरेर लगेको बस भेटीयो बिराटनगरमा बेबारिसे अवस्थामा

सुनसरीको धरान उपमहानगरपालिका–८ स्थित ग्यारेजमा पार्क गरिएको सिद्धदेवी यातायातको बस वैशाख १२ गते शुक्रबार रातीदेखी हराएको थियो । सो बस मंगलबार विराटनगरमा पाटपुर्जा निकालेर बेच्न ठिक पारेको अवस्थामा फेला पर्यो । बस फेला पर्दा चारवटै चक्का, इन्जिनलगायतका पार्टपुर्जा निकालिएको अवस्थामा भेटिएको हो। बसको भित्रका सामान चोरी गरी बिक्री गरिएको खुल्न आएपछि प्रहरीले अनुसन्धान अघि बढाएको थियो ।

अनुसन्धानको क्रममा ती सामान विराटनगर–६ मा गीतादेवी साहले सञ्चालन गरेको मन्टु आइरन स्टोर कवाडी पसलमा फेला परेको बताइएको छ ।
सिसाको माथिल्लो भागमा सिद्धदेवी यातायात र तल्लो भागमा याक्थुङ यातायात लेखिएको छ । धरानबाट चोरी भएको बस पूर्वपश्चिम हाइवेमा पर्ने खोर्सानेसम्म पुगेको सीसीक्यामेरामा देखिएको प्रहरीले जनाएको छ ।

बस कसले चोरेर विराटनगर ल्याएको थियो भन्ने खोजी भइरहेको जिल्ला प्रहरी कार्यालय मोरङले जनाएको छ । बेबारिसे अवस्थामा बस देखेपछि स्थानीयले प्रहरीलाई खबर गरेका थिए । बसका चोरी भएका सामान खरिद गरी बिक्री गर्ने समूह फरार रहेको र उनीहरूको खोजी भइरहेको प्रहरीले जनाएको छ। कवाडी पसल सञ्चालक गीतादेवी साहमाथि पनि अनुसन्धान सुरु गरिएको छ।

• संसद विघटन