मेचीनगर । मेचीनगर नगरपालिकाका केही जनप्रतिनिधि चुनावी प्रचार कार्यक्रममा सहभागी भएको पाइएको छ । निर्वाचन आयोगले कुनै पनि चुनावी प्रचार प्रसारमा सहभागी हुन नपाइने व्यवस्था गरेको छ । सहभागी भएको पाइएमा कानुन बमोजिम कारवाही हुने व्यवस्था छ ।
तर, जनप्रतिनिधिहरु खुलेआम आफ्नो पार्टीलाई जिताउन भन्दै चुनावी प्रचारमा निस्किएका छन् । विशेषगरी नेकपा एमालेबाट निर्वाचित जनप्रतिनिधिले आफ्ना उम्मेद्वारको पक्षमा भोट मागिरहेका छन् । मेचीनगर कार्यपालिका सदस्य चित्र धिमाल, कविता खनाल सार्की, वडा नं. ८ का वडा सदस्य विष्णु भट्टराई, वडा सदस्य मनकुमारी गिरीलगायतले निर्वाचन आचारसंहिता उल्लघंन गरेका हुन् ।
चुनावको मिति नजिकिँदै गर्दा एमाले निकट जनप्रतिनिधिले आचारसंहिताको धज्जी उडाएका मात्रै छैनन, आफ्नो उम्मेद्वारलाई जिताउन विभिन्न प्रलोभन र आश्वासन बाँडिरहेको बुझिएको छ । नगरका केही एमाले निकट कर्मचारीसमेत घरदैलोमा सहभागी भएका छन् । मेचीनगर–९ को एमाले पार्टीको घरदैलो कार्यक्रममा कर्मचारी सन्जय ढुंगाना स्वयम् सहभागी भएका थिए ।
(सबै प्रमाण सुरक्षित छन् )
