दुर्गा प्रसाईको महाअभियान आज शुरु हुँदै, दुई लाख मानिस उतार्ने दाबी

झापा, फागुन १ । झापाका मेडिकल व्यवसायी दुर्गा प्रसाईले आजदेखि नागरिक बचाउ महाअभियान शुरु गर्ने हुनु भएको छ । राष्ट्र, राष्ट्रियता, धर्म, संस्कृति र नागरिक बचाउ महाअभिायन आज विहान १० बजे पुर्वी सिमाना मेची नदिमा तामाको नौ मुखे दियो बालेर शुरु गरिने अभियानका बारेमा जानकारी दिन हिजो आयोजित पत्रकार सम्मेलनमा प्रसाईले बताउनु भयो ।

महाअभियानको शुभारम्भ गर्न पुर्व राजा ज्ञानेन्द्र शाह, पुर्व युवराज पारस शाह सहित पुर्व राजपरिवारका सदस्यहरुको उपस्थिति हुने समेत प्रसाईले पत्रकार सम्मेलनमा बताउनु भयो । नेकपा एमालेका केन्द्रीय सदस्य समेत रहनु भएका प्रसाईले अहिलेकै अवस्थाबाट आम नेपालीमा आइपरेको संकट समाधान नहुने भन्दै देशलाई २०४६ चैत २६ गतेकै अवस्थामा फर्काउनु पर्ने धारणा राख्नु भयो । घुमाउरो पाराले राजसंस्थालाई पनस्थापनाको वकालत गर्नु भएका प्रसाईले आवश्यक परे जतिबेला पनि एमाले परित्याग गर्न सक्ने पत्रकार सम्मेलनमा बताउनु भयो ।

मेची नदिमा शान्तिको प्रतिक सेतो परेवा उडाएर ९ जना ब्राम्हण गुरुहरुले स्वस्ती पाठ गरेर महाअभियानको शुभारम्भ गरिने समेत प्रसाईले बताउनु भयो । अभियानको शुरुवातमा काकरभिट्टामा दुई लाख मानिस आउने पनि प्रसाईले दाबी गर्नु भयो । वहाँका अनुसार देशबाट मात्रै होईन विश्वका विभिन्न देशमा रहेका नेपालीहरु यो अभियानमा सहभागि हुन आएका छन । ‘गिता हाम्रो मार्ग दर्शन हो,’ प्रसाईले भन्नुभयो, ‘गिताले भने अनुसार गर्दा मात्रै देशको संकट टर्छ ।’

महाअभियानको मुख्य उद्देश्य नागरिकलाई बचाउनु रहेको प्रसाईको दाबी छ । आर्थिक संकटका बेला सरकार छ भन्ने देखाउनु पर्ने हो तर त्यसो हुन नसकेको प्रसाईले बताउनु भयो । वहाँले भन्नुभयो, ‘नेपालीको २० लाखसम्मको ऋण मिनाहा हुनु पर्छ नत्र के को सरकार ।’
मेचीबाट शुरु भएको महाअभियान महाकाली पुगेर समापन हुने र यसमा देशका बहुसंख्यक नागरिक जोडिने प्रसाईले बताउनु भयो ।

• संसद विघटन