प्रधानमन्त्री पुष्पकमल दाहाल ’प्रचण्ड’ र नेकपा एमालेका केन्द्रीय सचिव लेखराज भट्टबीच भेटवार्ता भएको छ। एमाले सुदूरपश्चिम इन्चार्ज समेत रहेका भट्टको अत्तरियास्थित निवासमा उनीहरूबीच भेटवार्ता भएको हो।
प्रधानमन्त्री प्रचण्ड,भट्ट र उनकी श्रीमतीबीच भेटवार्ता भएको हो। उनीहरूबीच समसामयिक राजनीतिक तथा पारिवारिक विषयमा छलफल भएको थियो। छलफलपछि प्रधानमन्त्री प्रचण्डले भने,’लेखराजजीको घर मेरै घर हो। उहाँले मलाई एउटा छुट्टै कोठा दिनु भएको छ। हाम्रो ४० वर्षदेखिको सम्बन्ध हो।’
भट्टले समसायिक राजनीतिक विषयमा छलफल भएको बताए। उनले भने,’प्रचण्डजीले भनेजस्तै यो मेरो घर उहाँको पनि हो। हामीबीच लामो सम्बन्ध छ। ’
सञ्चारकर्मीहरूले तपाईंलाई प्रचण्डले पुरानै घरमा फर्काउने प्रयास गर्नु भएको होइन त ? भन्दै प्रश्न गरेका थिए। जवाफमा भट्टले भने,’अहिले माओवादीमा फर्किने संभावना छैन।’
भट्ट पूर्वमाओवादी समेत हुन्। प्रधानमन्त्री प्रचण्ड महेन्द्रनगरस्थित सुदूरपश्चिम विश्वविद्यालयको दीक्षान्तर समारोहमा सहभागी हुन् आइतबार बिहान धनगढी पुगेका हुन्। सोही क्रममा प्रचण्ड र भट्टबीच भेटवार्ता भएको हो।
