चितवन । चितवनमा जारी उपनिर्वाचनमा चर्को घाममा मतदाताको उत्साहपूर्ण सहभागिता देखिएको छ । विहान ७ बजेबाट सुरु भएको मतदान कार्य अहिले पनि जारी छ । चर्को घाम लागेर गर्मी भए पनि मतदान स्थलसम्म पैदल हिडेरै मतदाताहरु मतदान गरिरहनुभएको छ । ज्येष्ठनागरिक, महिला, अपाङ्गता भएका, किरियापुत्री सबैको उत्साह देखिएको मुख्य निर्वाचन कार्यालयको सूचना अधिकारी ईश्वर आचार्यले जानकारी दिनुभयो ।
भरतपुर महानगरपालिका १० को नारायणी माध्यमिक विद्यालयस्थलमा मतदान गर्न हिडेको दुर्गा पौडेलले आफ्नो मतको अधिकार प्रयोग गर्न गर्मीके वेवास्ता गरेको बताउनुभयो । भरतपुर महानगरपालिका १२ का शोभा पण्डितले संविधानले दिएको अधिकारलाई घामपानीले नछेक्ने भएकाले आफूले चाहेको उम्मेदवारलाई जिताउन घामको बेपर्वाह गरेको बताउनुभयो ।
मतदान कार्यमा महिला मतदाताको उत्साह अझ बढी देखिएको छ । खुला सडकमा पैदल, साइकलमा छाता ओढेर मत हाल्न हिडेका छन् । आइतबार चितवनको तापक्रम ३५ डिग्री सेल्सियस रहेको भरतपुर विमानस्थलका प्रमुख दीपक विकले जानकारी दिनुभयो । चितवनमा आज विहानदेखि घाम लागेको छ ।
बिहान ७ बजेदेखि सुरु भएको मतदान साँझ ५ बजेसम्म सञ्चालन हुने मुख्य निर्वाचन अधिकृतको कार्यालय भरतपुरले जनाएको छ । यहाँ एक लाख २४ हजार छ सय ९५ मतदाता रहेका छन् । त्यसमध्ये ६३ हजार दुई सय ९१ महिला, ६१ हजार चार सय तीन पुरुष र एक जना तेस्रोलिङ्गी रहनुभएको छ ।
