त्रिभुवन विश्वविद्यालयअन्तर्गत स्नातक तेस्रो वर्ष ‘इन्टरडक्सन टू टुरिजम डेभलप्मेन्ट’ विषयको प्रश्नपत्र त्रुटि घटनका दोषीलाई तत्काल कारबाही गर्न विद्यार्थी संगठनहरुले माग गरेका छन् ।
अनेरास्ववियु, नेपाल विद्यार्थी संघलगायतले विज्ञप्ति जारी गर्दै तत्काल छानबिन समिति गठन गरी दोषीलाई कारबाही गर्न माग गरेका हुन् ।
“त्रिविको समग्र परीक्षा प्रणालीमा भइरहेको लापरबाही अन्त्य गर्दै दोषीलाई कारबाही नगरेको खण्डमा उत्पन्न हुने परिस्थितिको जिम्मेवार त्रिवि स्वयं हुनुपर्ने चेतावनी समेत दिन चाहन्छौँ,” नेपाल विद्यार्थी संघद्वारा जारी विज्ञप्तिमा भनिएको छ ।
भित्रि कुरा
सोमबार त्रिवि मानविकी संकाय स्नातक तेस्रो वर्षको इन्टरडक्सन टू टुरिजम डेभलपमेन्ट विषयको परीक्षा थियो । प्रश्नपत्रमा दुई समूहमा सोधिएका नौमध्ये ६ वटा प्रश्न भारतको टुरिजम र इतिहाससँग सम्बन्धित थिए । जुन सम्बन्धित विषयको पाठ्यक्रमभन्दा बाहिरको विषय हो ।
प्रश्नपत्रमा त्रुटि भएको विषयमा विद्यार्थीको विरोध भएपछि झण्डै ५० मिनेट परीक्षा अवरुद्ध भइसकेपछि पुनः दोस्रो प्रश्नपत्र बाँडिएको थियो । परीक्षाको माहोल बिग्रिएपछि कतिपय विद्यार्थी दोस्रो प्रश्नपत्रमा समेत परीक्षा नदिएर बाहिरिएका थिए ।
परीक्षा नियन्त्रक पुष्पराज जोशीले प्रश्नपत्रमा त्रुटि भएको स्वीकार गरेका छन् । त्रिवि मानविकी संकायको डिन कार्यालयले घटनाको छानबिन भइरहेको जनाएको छ ।
