महँगी र खाद्यान्नको सहजबारे हुन्छ, म गर्छु, छिट्टै गर्छु भन्दै भारतले कार्यान्वयन नै गरेन : आपूर्तिमन्त्री रिजाल
साझा परिवेश
सोमवार, अशोज ८, २०८० १४:११
महँगी र खाद्यान्नको सहज आपूर्ति गर्नेबारे भारतले वास्तै गरेन
हुन्छ, म गर्छु, छिट्टै गर्छु भन्छन्, तर अहिलेसम्म कार्यान्वयनको अवस्था छैन’
काठमाडौं ।।
उद्योग, वाणिज्य तथा आपूर्ति मन्त्री रमेश रिजालले भारतीय पक्षसँग पटक पटक संवाद गरे पनि आपूर्ति सहज बनाउन नसकेको पार्टी बैठकमा सुनाएका छन् । केन्द्रीय समिति बैठकमा बोल्ने अधिकांश सदस्यहरुले महँगी र खाद्यान्नको सहज आपूर्ति हुन नसकेको विषय उठाएका थिए । धान, चामल र चिनीको आपूर्ति र बढ्दो महँगीलाई लिएर प्रश्न उठेपछि मन्त्री रिजालले भने,‘इण्डियाको वाणिज्य मन्त्रीसँग पनि कुरा गरें, धान, चामल र चिनीको विषयमा । हुन्छ, म गर्छु, छिट्टै गर्छु भन्छन्, तर अहिलेसम्म कार्यान्वयनको अवस्था छैन ।’
भारतीय राजदूतसँग पनि यसै विषयमा ४-५ पटक कुरा गरेको उनले बैठकमा सुनाए । मन्त्री रिजाल भन्छन्, ‘राजदूतले भइराखेको छ, चिन्ता नगर्नुस् भनि प्रतिवद्धता जनाए पनि कार्यान्वयनको अवस्था नबनेको उनले बताए ।’ चिनीको हाहाकार भएकाले १०-१० हजार हजार क्विन्टल खाद्य संस्थान, साल्ट ट्रेडिङलाई टेण्डर गर्न आग्रह गरेको मन्त्री रिजालले जानकारी गराए । सरकारी दुई निकायले टेण्डर गरि आयात गरेको चिनीमा सरकारले ५० प्रतिशत भन्सार बेहोर्ने गरि प्रक्रिया अघि बढेको उनले बैठकमा जानकारी गराए ।
