राजन अधिकारी फाउण्डेसनको एम्बुलेन्समा गाँजा तस्करी
साझा परिवेश
बुधबार, अशोज १०, २०८० १५:२३
गाँजा तस्करीमा प्रयोग भएको एम्बुलेसलाई प्रहरीले नियन्त्रणमा लिएको छ । मोरङ विराटनगर महानगरपालिका– १८ लाभाघाटबाट गाँजा बोकेको एम्वुलेन्ससहित चालकलाई प्रहरीले पक्राउ गरेको हो ।
मंगलबार राति साढे १० बजे इलाका प्रहरी कार्यालय बुधनगरबाट खटिएको प्रहरी टोलिले चेक जाँचको क्रममा को.१ च ४६१९ को एम्बुलेन्सको डिकीमा २१.५ किलो गाँजा बरामद गरेको हो । प्रहरीले गाँजासहितको एम्बुलेन्सँगै चालक धरान उपमहानगरपालिका– ११ का ३८ वर्षीय गंगा सरकारलाई पनि पक्राउ गरेको छ ।
गाँजासहित प्रहरीले नियन्त्रणमा लिएको एम्बुलेन्स राजन अधिकारी फाउण्डेसन धरानको हो । अधिकारी नेपालका अग्ला व्यक्ती हुन् । उनकाे नाममा फाउन्डेशन सञ्चालित छ ।
सोही स्थानबाट प्रहरीले भारतीय नम्बर प्लेट विआर ३८ एएफ०३३६ नम्बरको मोटरसाइकलपनि नियन्त्रणमा लिएको छ ।
गाँजासहित नियन्त्रणमा लिइएको एम्बुलेन्स र चालकलाई इलाका प्रहरी कार्यालय रानीमा राखेर अनुसन्धन भइरहेको प्रहरीले बताएको छ ।
