राहुल महरालाई केन्द्रीय कारागार सुन्धारा चलान गरियो
बेल्जियम नागरिक दावा छिरिङ भने यसअघि नै जेल पुगे
काठमाडौं ।।
विद्युतीय सिगरेट (भेप) मार्फत भएको ९ किलो सुन तस्करी प्रकरणमा पक्राउ परेका माओवादी उपाध्यक्ष तथा पूर्वसभामुख कृष्णबहादुर महराका छोरा राहुल महरालाई केन्द्रीय कारागार सुन्धारा चलान गरिएको छ । भदौ १३ मा पक्राउ परेका महरालाई जिल्ला अदालत काठमाडौंले शुक्रबार पुर्पक्षका लागि जेल चलान गरेको थियो । अदालतको आदेशपछि उनलाई सुन्धारा कारागार चलान गरिएको हो । उनीसँगै सो अभियोगमा पक्राउ परेका लोकेन्द्र पौडेलसमेत जेल चलान भएका छन् ।
पौडेल भेपमार्फत ९ किलो सुन नेपाल भित्र्याउने चिनियाँ नागरिक दाओजिङ वाङका गाडी चालक हुन् । ६१ किलो सुन तस्करीमा पक्राउ परेका बेल्जियम नागरिक दावा छिरिङ भने यसअघि नै जेल पुगेका थिए । ९ किलो सुनमा समेत उनको संलग्नता खुलेको थियो । त्यस्तै, बौद्धका निमा गुरुङको समेत ९ किलो सुन तस्करीमा संलग्न देखिएको छ । उनी भने फरार छन् । हाल सुन्धारा कागारभित्र भुटानी शरणर्थी प्रकरणमा पक्राउ परेका पूर्वगृहमन्त्री बालकृष्ण खाँण, एमालेका सचिव टोपबहादुर रायमाझी, सचिव टेकनारायण पाण्डेसहित रायमाझीका छोरा सन्दीप रायमाझीलाई पनि राखिएको छ ।
